talluq ki nai ek rasm ab ijad karna hai

ta.alluq kī na.ī ik rasm ab ījād karnā hai

na us ko bhūlnā hai aur na us ko yaad karnā hai

zabāneñ kaT ga.iiñ to kyā salāmat uñgliyāñ to haiñ

dar o dīvār pe likh do tumheñ fariyād karnā hai

sitāra ḳhush-gumānī kā sajāyā hai hathelī par

kisī sūrat hameñ to apne dil ko shaad karnā hai

banā kar ek ghar dil kī zamīñ par us kī yādoñ kā

kabhī ābād karnā hai kabhī barbād karnā hai

taqāzā vaqt kā ye hai na pīchhe muḌ ke dekheñ ham

so ham ko vaqt ke is faisle par saad karnā hai

talluq ki nai ek rasm ab ijad karna hai

na us ko bhulna hai aur na us ko yaad karna hai

zabanen kaT gain to kya salamat ungliyan to hain

dar o diwar pe likh do tumhein fariyaad karna hai

sitara KHush-gumani ka sajaya hai hatheli par

kisi surat hamein to apne dil ko shad karna hai

bana kar ek ghar dil ki zamin par us ki yaadon ka

kabhi aabaad karna hai kabhi barbaad karna hai

taqaza waqt ka ye hai na pichhe muD ke dekhen hum

so hum ko waqt ke is faisle par sad karna hai