talluqat ki garmi na etibar ki dhup

ta.alluqāt kī garmī na e'tibār kī dhuup

jhulas rahī hai zamāne ko intishār kī dhuup

ġham-e-hayāt ke saa.e muhīb haiñ varna

kise pasand nahīñ hai ḳhayāl-e-yār kī dhuup

abhī se amn kī ThanDak talāsh karte ho

abhī to chamkī hai yaaro salīb-o-dār kī dhuup

alam kī rāhguzar par bahut hī kaam aa.iiñ

tumhārī yaad kī sham.eñ hamāre pyaar kī dhuup

kamand Daal deñ sūraj pe aao mil-jul kar

ab aur tez na hone deñ rozgār kī dhuup

laboñ pe mohr jigar ḳhūñ-chakāñ nazar hairāñ

ab aur kaise jalā.egī ye bahār kī dhuup

tumhāre shahr kī shaidā-ba-dast yādoñ ko

talāsh kartī rahī dil ke kohsār kī dhuup

bahut qarīb haiñ saa.e hayāt-e-nau ke 'umīd'

bahut hī jald Dhalegī ab intizār kī dhuup

talluqat ki garmi na e'tibar ki dhup

jhulas rahi hai zamane ko intishaar ki dhup

gham-e-hayat ke sae muhib hain warna

kise pasand nahin hai KHayal-e-yar ki dhup

abhi se amn ki ThanDak talash karte ho

abhi to chamki hai yaro salib-o-dar ki dhup

alam ki rahguzar par bahut hi kaam aain

tumhaari yaad ki shamen hamare pyar ki dhup

kamand Dal den suraj pe aao mil-jul kar

ab aur tez na hone den rozgar ki dhup

labon pe mohr jigar KHun-chakan nazar hairan

ab aur kaise jalaegi ye bahaar ki dhup

tumhaare shahr ki shaida-ba-dast yaadon ko

talash karti rahi dil ke kohsar ki dhup

bahut qarib hain sae hayat-e-nau ke 'umid'

bahut hi jald Dhalegi ab intizar ki dhup