tamam shahr mein tira-shabi ka charcha tha

tamām shahr meñ tīra-shabī kā charchā thā

ye aur baat ki sūraj ufuq pe niklā thā

ajiib vaj.h-e-mulāqāt thī mirī us se

ki vo bhī merī tarah shahr meñ akelā thā

maiñ sab samajhtī rahī aur muskurātī rahī

mirā mizāj azal se payambaroñ sā thā

maiñ us ko kho ke bhī us ko pukārtī hī rahī

ki saarā rabt to āvāz ke safar kā thā

maiñ gul-parast bhī gul se nibāh kar na sakī

shu.ūr-e-zāt kā kāñTā bahut nukīlā thā

sab ehtisāb meñ gum the hujūm-e-yārāñ meñ

ḳhudā kī tarah mirā jurm-e-ishq tanhā thā

vo tere qurb kā lamha thā yā koī ilhām

ki us ke lams se dil meñ gulāb khiltā thā

mujhe bhī mere ḳhudā kulfatoñ kā ajr mile

tujhe zamīñ pe baḌe karb se utārā thā

tamam shahr mein tira-shabi ka charcha tha

ye aur baat ki suraj ufuq pe nikla tha

ajib wajh-e-mulaqat thi meri us se

ki wo bhi meri tarah shahr mein akela tha

main sab samajhti rahi aur muskuraati rahi

mera mizaj azal se payambaron sa tha

main us ko kho ke bhi us ko pukarti hi rahi

ki sara rabt to aawaz ke safar ka tha

main gul-parast bhi gul se nibah kar na saki

shuur-e-zat ka kanTa bahut nukila tha

sab ehtisab mein gum the hujum-e-yaran mein

KHuda ki tarah mera jurm-e-ishq tanha tha

wo tere qurb ka lamha tha ya koi ilham

ki us ke lams se dil mein gulab khilta tha

mujhe bhi mere KHuda kulfaton ka ajr mile

tujhe zamin pe baDe karb se utara tha