tilism-KHana-e-dil mein hai chaar-su raushan

tilism-ḳhāna-e-dil meñ hai chār-sū raushan

mirī nigāh ke zulmat-kade meñ tū raushan

bahut dinoñ pe huī hai rag-e-gulū raushan

sināñ kī nok pe ho jaa.e phir lahū raushan

tamām raat maiñ zulmāt-e-intizār meñ thā

tamām raat thā mahtāb-e-ārzū raushan

maiñ apne aap se hī jañg kartā rahtā huuñ

ki mujh pe hotā nahīñ ab mirā udū raushan

ajiib shor munavvar dil o dimāġh meñ hai

mire lahū meñ hai lekin sadā-e-hū raushan

safar safar mire qadmoñ se jagmagāyā huā

taraf taraf hai mirī ḳhāk-e-justujū raushan

bahār aa.ī to āñkhoñ meñ ḳhaak uḌne lagī

na koī phuul khilā aur na rañg o bū raushan

maiñ tīrgī ke samundar meñ Duub jaatā huuñ

vo jab bhī hotā hai ab mere rū-ba-rū raushan

ye aur baat ki 'aḳhtar' haveliyāñ na rahīñ

khañDar meñ kam to nahīñ apnī aabrū raushan

tilism-KHana-e-dil mein hai chaar-su raushan

meri nigah ke zulmat-kade mein tu raushan

bahut dinon pe hui hai rag-e-gulu raushan

sinan ki nok pe ho jae phir lahu raushan

tamam raat main zulmat-e-intizar mein tha

tamam raat tha mahtab-e-arzu raushan

main apne aap se hi jang karta rahta hun

ki mujh pe hota nahin ab mera udu raushan

ajib shor munawwar dil o dimagh mein hai

mere lahu mein hai lekin sada-e-hu raushan

safar safar mere qadmon se jagmagaya hua

taraf taraf hai meri KHak-e-justuju raushan

bahaar aai to aankhon mein KHak uDne lagi

na koi phul khila aur na rang o bu raushan

main tirgi ke samundar mein Dub jata hun

wo jab bhi hota hai ab mere ru-ba-ru raushan

ye aur baat ki 'aKHtar' haweliyan na rahin

khanDar mein kam to nahin apni aabru raushan