tere KHulus ke qisse suna raha hun main

tire ḳhulūs ke qisse sunā rahā huuñ maiñ

purānā qarz hai ab tak chukā rahā huuñ maiñ

ḳhudā kare ki vahī baat us ke dil meñ ho

jo baat kahne kī himmat juTā rahā huuñ maiñ

safar kahāñ se kahāñ tak pahuñch gayā merā

ruke jo paañv to kāñdhoñ pe jā rahā huuñ maiñ

samā'atoñ ke sabhī dar yahāñ muqaffal haiñ

na jaane kab se sadā.eñ lagā rahā huuñ maiñ

lagā huuñ aaj hifāzat meñ ḳhud charāġhoñ kī

ka.ī dinoñ to muḳhālif havā rahā huuñ maiñ

ye 'aql hosh, nazar, ḳhvāb, lams, goyā.ī

lo aaj daav pe sab kuchh lagā rahā huuñ maiñ

ki jab bhī chāheñ unheñ DhūñD leñ mirī āñkheñ

is ehtiyāt se manzar sajā rahā huuñ maiñ

mire baġhair koī tum ko DhūñDtā kaise

tumheñ pata hai tumhārā pata rahā huuñ maiñ

tere KHulus ke qisse suna raha hun main

purana qarz hai ab tak chuka raha hun main

KHuda kare ki wahi baat us ke dil mein ho

jo baat kahne ki himmat juTa raha hun main

safar kahan se kahan tak pahunch gaya mera

ruke jo panw to kandhon pe ja raha hun main

sama'aton ke sabhi dar yahan muqaffal hain

na jaane kab se sadaen laga raha hun main

laga hun aaj hifazat mein KHud charaghon ki

kai dinon to muKHalif hawa raha hun main

ye 'aql hosh, nazar, KHwab, lams, goyai

lo aaj daw pe sab kuchh laga raha hun main

ki jab bhi chahen unhen DhunD len meri aankhen

is ehtiyat se manzar saja raha hun main

mere baghair koi tum ko DhunDta kaise

tumhein pata hai tumhaara pata raha hun main