teri zamin se uThenge to aasman honge

tirī zamīñ se uTheñge to āsmāñ hoñge

ham aise log zamāne meñ phir kahāñ hoñge

chale ga.e to pukāregī har sadā ham ko

na jaane kitnī zabānoñ se ham bayāñ hoñge

lahū lahū ke sivā kuchh na dekh pāoge

hamāre naqsh-e-qadam is qadar ayaañ hoñge

sameT lījiye bhīge hue har ik pal ko

bikhar ga.e jo ye motī to rā.egāñ hoñge

uchāT dil kā Thikānā kisī ko kyā mālūm

ham apne aap se bichhḌe to phir kahāñ hoñge

haiñ apnī mauj ke bahte hue samundar ham

tamām dasht-e-junūñ meñ ravāñ-davāñ hoñge

ye bazm-e-yār hai qurbān jā.iye is par

sunā hai 'ashk' yahāñ dil sabhī javāñ hoñge

teri zamin se uThenge to aasman honge

hum aise log zamane mein phir kahan honge

chale gae to pukaregi har sada hum ko

na jaane kitni zabanon se hum bayan honge

lahu lahu ke siwa kuchh na dekh paoge

hamare naqsh-e-qadam is qadar ayan honge

sameT lijiye bhige hue har ek pal ko

bikhar gae jo ye moti to raegan honge

uchaT dil ka Thikana kisi ko kya malum

hum apne aap se bichhDe to phir kahan honge

hain apni mauj ke bahte hue samundar hum

tamam dasht-e-junun mein rawan-dawan honge

ye bazm-e-yar hai qurban jaiye is par

suna hai 'ashk' yahan dil sabhi jawan honge