to pahle mera hi haal-e-tabah likh lije

to pahle merā hī hāl-e-tabāh likh liije

phir apne aap ko aalam panāh likh liije

kitāb-e-sahrā meñ zikr aa.e jab samundar kā

mirī hayāt kisī kī nigāh likh liije

diyoñ ke qatl pe sūraj kī har kiran chup hai

is ehtiyāt ko jashn-e-siyāh likh liije

laboñ pe amn ke naġhme diloñ meñ jang kī aag

shikast-e-azm ba-nām-e-sipāh likh liije

vo mere qatl kā mulzim hai log kahte haiñ

vo chhuT sake to mujhe bhī gavāh likh liije

maiñ apne ghar kī tabāhī sambhāl lūñgā magar

zamāne bhar kā mujhe sarbarāh likh liije

ḳhatā.eñ itnī haiñ 'bekal' mujhe nahīñ ma.alūm

yahī sazā hai mirā har gunāh likh liije

to pahle mera hi haal-e-tabah likh lije

phir apne aap ko aalam panah likh lije

kitab-e-sahra mein zikr aae jab samundar ka

meri hayat kisi ki nigah likh lije

diyon ke qatl pe suraj ki har kiran chup hai

is ehtiyat ko jashn-e-siyah likh lije

labon pe amn ke naghme dilon mein jang ki aag

shikast-e-azm ba-nam-e-sipah likh lije

wo mere qatl ka mulzim hai log kahte hain

wo chhuT sake to mujhe bhi gawah likh lije

main apne ghar ki tabahi sambhaal lunga magar

zamane bhar ka mujhe sarbarah likh lije

KHataen itni hain 'bekal' mujhe nahin malum

yahi saza hai mera har gunah likh lije