umr kaTi buton ki aaDon mein

umr kaaTī butoñ kī aaḌoñ meñ

ban ke patthar rahā pahāḌoñ meñ

vo laḌā.ī meñ bol uThe mujh se

baat achchhī banī bigāḌoñ meñ

dard-e-sar ke ilaaj ko vahshat

khīñch kar le chalī pahāḌoñ meñ

mastiyāñ aur bahār kā mausam

mai kī lazzat gulābī jāḌoñ meñ

duḳhtar-e-raz kī sharm to dekho

chhup ga.ī jā ke ḳhum kī aaḌoñ meñ

tū ne pī hī nahīñ hai ai zāhid

mai kī garmī na pūchh jāḌoñ meñ

tere gesū bhī ho ga.e shāmil

merī taqdīr ke bigāḌoñ meñ

marg-e-dushman pe maut rotī hai

ye asar hai tirī pachhāḌoñ meñ

uThte joban pe khul paḌe gesū

aa ke jogī base pahāḌoñ meñ

vo gale se lipaT ke sote haiñ

āj-kal garmiyāñ haiñ jāḌoñ meñ

ishq meñ jaan par banī 'muztar'

zindagī kaT ga.ī bigāḌoñ meñ

umr kaTi buton ki aaDon mein

ban ke patthar raha pahaDon mein

wo laDai mein bol uThe mujh se

baat achchhi bani bigaDon mein

dard-e-sar ke ilaj ko wahshat

khinch kar le chali pahaDon mein

mastiyan aur bahaar ka mausam

mai ki lazzat gulabi jaDon mein

duKHtar-e-raz ki sharm to dekho

chhup gai ja ke KHum ki aaDon mein

tu ne pi hi nahin hai ai zahid

mai ki garmi na puchh jaDon mein

tere gesu bhi ho gae shamil

meri taqdir ke bigaDon mein

marg-e-dushman pe maut roti hai

ye asar hai teri pachhaDon mein

uThte joban pe khul paDe gesu

aa ke jogi base pahaDon mein

wo gale se lipaT ke sote hain

aaj-kal garmiyan hain jaDon mein

ishq mein jaan par bani 'muztar'

zindagi kaT gai bigaDon mein