us zulf ki tausif batai nahin jati

us zulf kī tausīf batā.ī nahīñ jaatī

ik lambī kahānī hai sunā.ī nahīñ jaatī

dil hai ki marā jaatā hai dīdār kī ḳhātir

ham haiñ ki udhar aañkh uThā.ī nahīñ jaatī

ashkoñ se kabhī soz-e-jigar kam nahīñ hotā

ye aag to paanī se bujhā.ī nahīñ jaatī

dil ye to tirā dāġh-e-muhabbat na chhupegā

ā.īne se tasvīr chhupā.ī nahīñ jaatī

yārab kahāñ le jā.ūñ maiñ hasrat-zada dil ko

ye laash to ab mujh se uThā.ī nahīñ jaatī

aahoñ se kamī ġham meñ na hogī dil-e-nādāñ

phūñkoñ se kabhī aag bujhā.ī nahīñ jaatī

kyuuñ ashk-e-nadāmat na bahā.eñ 'jigar' āñkheñ

jo dil meñ lagī hai vo bujhā.ī nahīñ jaatī

us zulf ki tausif batai nahin jati

ek lambi kahani hai sunai nahin jati

dil hai ki mara jata hai didar ki KHatir

hum hain ki udhar aankh uThai nahin jati

ashkon se kabhi soz-e-jigar kam nahin hota

ye aag to pani se bujhai nahin jati

dil ye to tera dagh-e-muhabbat na chhupega

aaine se taswir chhupai nahin jati

yarab kahan le jaun main hasrat-zada dil ko

ye lash to ab mujh se uThai nahin jati

aahon se kami gham mein na hogi dil-e-nadan

phunkon se kabhi aag bujhai nahin jati

kyun ashk-e-nadamat na bahaen 'jigar' aankhen

jo dil mein lagi hai wo bujhai nahin jati