kya dil ka ye ilaqa Khaali paDa rahega

kyā dil kā ye ilāqa ḳhālī paḌā rahegā

ham tum na hoñge to bhī mela lagā rahegā

zaḳhmoñ ko ashk-e-ḳhūñ se sairāb kar rahā huuñ

ab aur bhī tumhārā chehra khilā rahegā

band-e-qabā kā khulnā mushkil bahut hai lekin

lekin khulā to phir ye uqda khulā rahegā

sargarmī-e-havā ko dekhā hai paas dil ke

is aag se ye jangal kab tak bachā rahegā

khultī nahīñ hai yā rab kyuuñ niiñd raftagāñ kī

kyā hashr tak ye aalam soyā paḌā rahegā

yaksar hamāre baazū shal ho ga.e haiñ yā-rab

āḳhir darāz kab tak dast-e-duā rahegā

kya dil ka ye ilaqa KHali paDa rahega

hum tum na honge to bhi mela laga rahega

zaKHmon ko ashk-e-KHun se sairab kar raha hun

ab aur bhi tumhaara chehra khila rahega

band-e-qaba ka khulna mushkil bahut hai lekin

lekin khula to phir ye uqda khula rahega

sargarmi-e-hawa ko dekha hai pas dil ke

is aag se ye jangal kab tak bacha rahega

khulti nahin hai ya rab kyun nind raftagan ki

kya hashr tak ye aalam soya paDa rahega

yaksar hamare bazu shal ho gae hain ya-rab

aaKHir daraaz kab tak dast-e-dua rahega