wafadaron pe aafat aa rahi hai

vafādāroñ pe aafat aa rahī hai

miyāñ le lo jo qīmat aa rahī hai

maiñ us se itne va.ade kar chukā huuñ

mujhe is baar ġhairat aa rahī hai

na jaane mujh meñ kyā dekhā hai us ne

mujhe us par mohabbat aa rahī hai

badaltā jā rahā hai jhuuT sach meñ

kahānī meñ sadāqat aa rahī hai

mirā jhagḌā zamāne se nahīñ hai

mire aaḌe mohabbat aa rahī hai

abhī raushan huā jaatā hai rasta

vo dekho ek aurat aa rahī hai

mujhe us kī udāsī ne batāyā

bichhaḌ jaane kī saa.at aa rahī hai

baḌoñ ke darmiyāñ baiThā huā huuñ

nasīhat par nasīhat aa rahī hai

wafadaron pe aafat aa rahi hai

miyan le lo jo qimat aa rahi hai

main us se itne wade kar chuka hun

mujhe is bar ghairat aa rahi hai

na jaane mujh mein kya dekha hai us ne

mujhe us par mohabbat aa rahi hai

badalta ja raha hai jhuT sach mein

kahani mein sadaqat aa rahi hai

mera jhagDa zamane se nahin hai

mere aaDe mohabbat aa rahi hai

abhi raushan hua jata hai rasta

wo dekho ek aurat aa rahi hai

mujhe us ki udasi ne bataya

bichhaD jaane ki saat aa rahi hai

baDon ke darmiyan baiTha hua hun

nasihat par nasihat aa rahi hai