wasl ka mausam ho to ye sardiyan hi Thik hain

vasl kā mausam ho to ye sardiyāñ hī Thiik haiñ

hijr meñ qurbat kī ye parchhā.iyāñ hī Thiik haiñ

kyā batā.ūñ maiñ ki tum ne kis ko sauñpī hai hayā

is liye sochā mirī ḳhāmoshiyāñ hī Thiik haiñ

ishq se bezār dil ye chīḳh kar kahne lagā

ishq chhoḌo āshiqoñ tanhā.iyāñ hī Thiik haiñ

is qadar ham ho chuke rusvā vafā ke naam par

ab sharāfat chhoḌ dī bad-nāmiyāñ hī Thiik haiñ

aap ne chāhā judā.ī so alag ham ho ga.e

kyā kaheñ ab aap kī ye marziyāñ hī Thiik haiñ

ho na paa.e jab mukammal ishq kā qissa to phir

shohrateñ rahne do ab gum-nāmiyāñ hī Thiik haiñ

is se pahle ham judā hoñ kuchh bharam baaqī rahe

darmiyāñ ab talḳh sī ye dūriyāñ hī Thiik haiñ

bujh chukā jo kyoñ vo sulgā.ūñ mohabbat kā alaav

ab talak jhelī jafā kī saḳhtiyāñ hī Thiik haiñ

hai fasāna ishq kā Duubā hai sāhil ashk meñ

mere mazmūñ kā ye unvāñ talḳhiyāñ hī Thiik haiñ

wasl ka mausam ho to ye sardiyan hi Thik hain

hijr mein qurbat ki ye parchhaiyan hi Thik hain

kya bataun main ki tum ne kis ko saunpi hai haya

is liye socha meri KHamoshiyan hi Thik hain

ishq se bezar dil ye chiKH kar kahne laga

ishq chhoDo aashiqon tanhaiyan hi Thik hain

is qadar hum ho chuke ruswa wafa ke nam par

ab sharafat chhoD di bad-namiyan hi Thik hain

aap ne chaha judai so alag hum ho gae

kya kahen ab aap ki ye marziyan hi Thik hain

ho na pae jab mukammal ishq ka qissa to phir

shohraten rahne do ab gum-namiyan hi Thik hain

is se pahle hum juda hon kuchh bharam baqi rahe

darmiyan ab talKH si ye duriyan hi Thik hain

bujh chuka jo kyon wo sulgaun mohabbat ka alaw

ab talak jheli jafa ki saKHtiyan hi Thik hain

hai fasana ishq ka Duba hai sahil ashk mein

mere mazmun ka ye unwan talKHiyan hi Thik hain