wo chand hai to aks bhi pani mein aaega

vo chāñd hai to aks bhī paanī meñ aa.egā

kirdār ḳhud ubhar ke kahānī meñ aa.egā

chaḌhte hī dhuup shahr ke khul jā.eñge kivāḌ

jismoñ kā rahguzār ravānī meñ aa.egā

ā.īna haath meñ hai to sūraj pe aks Daal

kuchh lutf bhī surāġh-rasā.ī meñ aa.egā

raḳht-e-safar bhī hogā mire saath shahr meñ

sahrā bhī shauq-e-naql-e-makānī meñ aa.egā

phir aa.egā vo mujh se bichhaḌne ke vāste

bachpan kā daur phir se javānī meñ aa.egā

kab tak lahū ke habs se garmā.egā badan

kab tak ubaal aag se paanī meñ aa.egā

sūrat to bhuul baiThā huuñ āvāz yaad hai

ik umr aur zehn girānī meñ aa.egā

'sājid' tū apne naam kā katba uThā.e phir

ye lafz kab libās-e-ma.ānī meñ aa.egā

wo chand hai to aks bhi pani mein aaega

kirdar KHud ubhar ke kahani mein aaega

chaDhte hi dhup shahr ke khul jaenge kiwaD

jismon ka rahguzar rawani mein aaega

aaina hath mein hai to suraj pe aks Dal

kuchh lutf bhi suragh-rasai mein aaega

raKHt-e-safar bhi hoga mere sath shahr mein

sahra bhi shauq-e-naql-e-makani mein aaega

phir aaega wo mujh se bichhaDne ke waste

bachpan ka daur phir se jawani mein aaega

kab tak lahu ke habs se garmaega badan

kab tak ubaal aag se pani mein aaega

surat to bhul baiTha hun aawaz yaad hai

ek umr aur zehn girani mein aaega

'sajid' tu apne nam ka katba uThae phir

ye lafz kab libas-e-maani mein aaega