ye jang haar na jae sipah qaid mein hai

ye jang haar na jaa.e sipāh qaid meñ hai

ġhulām taḳht pe qābiz haiñ shaah qaid meñ hai

parinde is liye zindāñ ke gird ghūmte haiñ

ki un kī Daar kā ik be-gunāh qaid meñ hai

tire huqūq kī koī nahīñ zamānat ab

ġharīb-e-shahr tirā ḳhair-ḳhvāh qaid meñ hai

suḳhan kī ham ko ijāzat na hukm dekhne kā

qalam asīr-e-salāsil nigāh qaid meñ hai

savāl kaun uThā.egā munsifoñ pe huzūr

barī hue sabhī mujrim gavāh qaid meñ hai

ye ‘arsh-o-farsh ko ik din hilā.egī 'komal'

darūn-e-dil jo mirī sard aah qaid meñ hai

ye jang haar na jae sipah qaid mein hai

ghulam taKHt pe qabiz hain shah qaid mein hai

parinde is liye zindan ke gird ghumte hain

ki un ki Dar ka ek be-gunah qaid mein hai

tere huquq ki koi nahin zamanat ab

gharib-e-shahr tera KHair-KHwah qaid mein hai

suKHan ki hum ko ijazat na hukm dekhne ka

qalam asir-e-salasil nigah qaid mein hai

sawal kaun uThaega munsifon pe huzur

bari hue sabhi mujrim gawah qaid mein hai

ye ‘arsh-o-farsh ko ek din hilaegi 'komal'

darun-e-dil jo meri sard aah qaid mein hai