ye kahna to nahin kafi ki bas pyare lage hum ko

ye kahnā to nahīñ kaafī ki bas pyāre lage ham ko

unheñ kaise batā.eñ ham ki vo kaise lage ham ko

makīñ the yā kisī khoī huī jannat kī tasvīreñ

makāñ is shahr ke bhūle hue sapne lage ham ko

ham un ko soch meñ gum dekh kar vāpas chale aa.e

vo apne dhyān meñ baiThe hue achchhe lage ham ko

bahut shaffāf the jab tak ki masrūf-e-tamannā the

magar is kār-e-duniyā meñ baḌe dhabbe lage ham ko

jahāñ tanhā hue dil meñ bhañvar se paḌne lagte haiñ

agarche muddateñ guzrīñ kināre se lage ham ko

ye kahna to nahin kafi ki bas pyare lage hum ko

unhen kaise bataen hum ki wo kaise lage hum ko

makin the ya kisi khoi hui jannat ki taswiren

makan is shahr ke bhule hue sapne lage hum ko

hum un ko soch mein gum dekh kar wapas chale aae

wo apne dhyan mein baiThe hue achchhe lage hum ko

bahut shaffaf the jab tak ki masruf-e-tamanna the

magar is kar-e-duniya mein baDe dhabbe lage hum ko

jahan tanha hue dil mein bhanwar se paDne lagte hain

agarche muddaten guzrin kinare se lage hum ko