ye mulaqat mulaqat nahin hoti hai

ye mulāqāt mulāqāt nahīñ hotī hai

baat hotī hai magar baat nahīñ hotī hai

bāryābī kā burā ho ki ab un ke dar par

agle vaqtoñ kī mudārāt nahīñ hotī hai

ġham to ghanghor ghaTāoñ kī tarah uThte haiñ

zabt kā dasht hai barsāt nahīñ hotī hai

ye mirā tajraba hai husn koī chaal chale

bāzi-e-ishq kabhī maat nahīñ hotī hai

vasl hai naam ham-āhañgī o yak-rañgī kā

vasl meñ koī burī baat nahīñ hotī hai

hijr tanhā.ī hai sūraj hai savā neze par

din hī rahtā hai yahāñ raat nahīñ hotī hai

zabt-e-girya kabhī kartā huuñ to farmāte haiñ

aaj kyā baat hai barsāt nahīñ hotī hai

mujhe allāh kī qasam sher meñ tahsīn-e-butāñ

maiñ jo kartā huuñ merī zaat nahīñ hotī hai

fikr-e-taḳhlīq-e-suḳhan masnad-e-rāhat pe hafīz

bā.is-e-kashf-o-karāmāt nahīñ hotī hai

ye mulaqat mulaqat nahin hoti hai

baat hoti hai magar baat nahin hoti hai

baryabi ka bura ho ki ab un ke dar par

agle waqton ki mudaraat nahin hoti hai

gham to ghanghor ghaTaon ki tarah uThte hain

zabt ka dasht hai barsat nahin hoti hai

ye mera tajraba hai husn koi chaal chale

bazi-e-ishq kabhi mat nahin hoti hai

wasl hai nam ham-ahangi o yak-rangi ka

wasl mein koi buri baat nahin hoti hai

hijr tanhai hai suraj hai sawa neze par

din hi rahta hai yahan raat nahin hoti hai

zabt-e-girya kabhi karta hun to farmate hain

aaj kya baat hai barsat nahin hoti hai

mujhe allah ki qasam sher mein tahsin-e-butan

main jo karta hun meri zat nahin hoti hai

fikr-e-taKHliq-e-suKHan masnad-e-rahat pe hafiz

bais-e-kashf-o-karamat nahin hoti hai