zaKHm khane se ya koi dhoka khane se hua

zaḳhm khāne se yā koī dhoka khāne se huā

baat kyā thī maiñ ḳhafā jis par zamāne se huā

ek pal meñ ik jagah se itnā raushan āsmāñ

koī taara bante bante TuuT jaane se huā

sochtā rahtā huuñ maiñ aksar ki āġhāz-e-jahāñ

din banāne se ki pahle shab banāne se huā

maiñ ġhalat yā tum ġhalat the chhoḌo ab is baat ko

honā thā jo kuchh vo jaise ik bahāne se huā

kuchh zamāne kī ravish ne saḳht mujh ko kar diyā

aur kuchh bedard maiñ us ko bhulāne se huā

baat saarī asl meñ ye thī maiñ us se bad-gumāñ

ik ta.alluq meñ kahīñ pe shak ke aane se huā

bach hī niklā huuñ maiñ jaaḌe kī baḌī yalġhār se

garm ab ke ghar badan kā ḳhas jalāne se huā

kyā kahūñ merī giraftārī kā koī ehtimām

kaise zer-e-dām rakkhe ek daane se huā

umr bhar kā ye jo hai 'shāhīñ' ḳhasāra ye mujhe

ek saude meñ koī nekī kamāne se huā

zaKHm khane se ya koi dhoka khane se hua

baat kya thi main KHafa jis par zamane se hua

ek pal mein ek jagah se itna raushan aasman

koi tara bante bante TuT jaane se hua

sochta rahta hun main aksar ki aaghaz-e-jahan

din banane se ki pahle shab banane se hua

main ghalat ya tum ghalat the chhoDo ab is baat ko

hona tha jo kuchh wo jaise ek bahane se hua

kuchh zamane ki rawish ne saKHt mujh ko kar diya

aur kuchh bedard main us ko bhulane se hua

baat sari asl mein ye thi main us se bad-guman

ek talluq mein kahin pe shak ke aane se hua

bach hi nikla hun main jaDe ki baDi yalghaar se

garm ab ke ghar badan ka KHas jalane se hua

kya kahun meri giraftari ka koi ehtimam

kaise zer-e-dam rakkhe ek dane se hua

umr bhar ka ye jo hai 'shahin' KHasara ye mujhe

ek saude mein koi neki kamane se hua