zamana hai ki mujhe roz sham Dasta hai

zamāna hai ki mujhe roz shaam Dastā hai

magar ye dil hai ki pahle se aur hañstā hai

tū ye batā unheñ kis ne banā diyā aisā

ki tere sāmne har koī dast-basta hai

maiñ us ko chhoḌ ke ab jā.ūñ to kahāñ jā.ūñ

yahī to ek merī zindagī kā rasta hai

ajiib baat hai lagtā hai yuuñ har ik chehra

ki bolne ke liye jis tarah tarastā hai

jo sukh kā saañs mile umr bhar ke badle bhī

tū merī maan ki saudā ye phir bhī sastā hai

sab ek dūsre ko ab to yuuñ bhī jānte haiñ

ki ek ek kā andar se haal ḳhasta hai

shikāyat aur to kuchh bhī nahīñ in āñkhoñ se

zarā sī baat pe paanī bahut barastā hai

karāhtā bhī hai har aan jo bhī zinda hai

aur apne gird shikanja bhī ḳhud hī kastā hai

hamārā kal koī pātāl meñ rakh aayā hai

samundaroñ meñ se kahte haiñ koī rasta hai

kisī tarah bhī to samjhā sake na ham us ko

zamāne se ye kaho ḳhud pe 'talḳh' hañstā hai

zamana hai ki mujhe roz sham Dasta hai

magar ye dil hai ki pahle se aur hansta hai

tu ye bata unhen kis ne bana diya aisa

ki tere samne har koi dast-basta hai

main us ko chhoD ke ab jaun to kahan jaun

yahi to ek meri zindagi ka rasta hai

ajib baat hai lagta hai yun har ek chehra

ki bolne ke liye jis tarah tarasta hai

jo sukh ka sans mile umr bhar ke badle bhi

tu meri man ki sauda ye phir bhi sasta hai

sab ek dusre ko ab to yun bhi jaante hain

ki ek ek ka andar se haal KHasta hai

shikayat aur to kuchh bhi nahin in aankhon se

zara si baat pe pani bahut barasta hai

karahta bhi hai har aan jo bhi zinda hai

aur apne gird shikanja bhi KHud hi kasta hai

hamara kal koi patal mein rakh aaya hai

samundaron mein se kahte hain koi rasta hai

kisi tarah bhi to samjha sake na hum us ko

zamane se ye kaho KHud pe 'talKH' hansta hai