zamzama kis ki zaban par ba-dil-e-shad aaya

zamzama kis kī zabāñ par ba-dil-e-shād aayā

muñh na kholā thā ki par bāñdhne sayyād aayā

qad jo buuTā sā tirā sarv-e-ravāñ yaad aayā

ġhash pe ġhash mujh ko chaman meñ tah-e-shamshād aayā

le uḌī dil ko sū-e-dasht havā-e-vahshat

phir ye jhoñkā mujhe kar dene ko barbād aayā

kis qadar dil se farāmosh kiyā āshiq ko

na kabhī aap ko bhūle se bhī maiñ yaad aayā

dil huā sarv-e-gulistāñ ke nazāre se nihāl

shajar-e-qāmat-e-dildār mujhe yaad aayā

ho ga.ī qat.a asīrī meñ umīd-e-parvāz

uḌ ga.e hosh jo par kāTne sayyād aayā

ho gayā hasrat-e-parvāz meñ dil sau TukḌe

ham ne dekhā jo qafas ko to falak yaad aayā

zamzama kis ki zaban par ba-dil-e-shad aaya

munh na khola tha ki par bandhne sayyaad aaya

qad jo buTa sa tera sarw-e-rawan yaad aaya

ghash pe ghash mujh ko chaman mein tah-e-shamshad aaya

le uDi dil ko su-e-dasht hawa-e-wahshat

phir ye jhonka mujhe kar dene ko barbaad aaya

kis qadar dil se faramosh kiya aashiq ko

na kabhi aap ko bhule se bhi main yaad aaya

dil hua sarw-e-gulistan ke nazare se nihaal

shajar-e-qamat-e-dildar mujhe yaad aaya

ho gai qata asiri mein umid-e-parwaz

uD gae hosh jo par kaTne sayyaad aaya

ho gaya hasrat-e-parwaz mein dil sau TukDe

hum ne dekha jo qafas ko to falak yaad aaya