ریختہ ایکسپلورر

کہہ مکرنی کے معنی ہیں "بات کہہ کر مکر جانا۔" شاعری میں یہ صنف پہیلی کی طرح ہوتی ہے جس میں کسی بات کو اس طرح کہا جاتا ہے کہ اس کے دو مطلب نکلتے ہوں اور دونوں صحیح بھی ہوں، لیکن جب مخاطب کسی ایک مطلب کی طرف اشارہ کرے تو جواب میں شاعر دوسرے مطلب کی بات کر دے ۔

ایسے اشعار کا مجموعہ جس میں کسی خیال کو تسلسل کے ساتھ پیش کیا جائے اسے قطعہ کہتے ہیں۔ یہ دو شعروں پر مشتمل ہوتا ہے اور دونوں میں باہمی ربط ضروری ہوتا ہے۔

"ترکیب بند" اردو شاعری کی ایک ایسی صنف ہے جو مختلف بندوں پرمشتمل ہوتی ہے۔ ہر بند ہم وزن اور ہم قافیہ شعروں سے بنتا ہے نیز ہر بند کے بعد ایک ایسا شعرلایا جاتا ہے جو وزن میں متفق ہو مگر اس کے قافیے میں اختلاف پایا جائے ۔

"عشرہ" عربی زبان کا لفظ ہے جس کے معنی " دس" ہوتے ہیں۔ یہ شاعری کی ایک صنف ہے, جسمیں نظم کی طرح سلسلہ وار دس مصرعے ہوتے ہیں۔

"واسوخت" اردوشاعری کی ایک صنف ہے جس میں شاعر اپنی وفاؤں کا ذکر کرتے ہوئے محبوب کی بے وفائی اور تغافل کا شکوہ کرتا ہے اور رقیب سے اس کے تعلق پر سرزنش کرتا ہے نیز کسی اور سے مراسم قائم کرنے کی دھمکی بھی دیتا ہے۔ عام طور پر اسے مسدس اور مثمن کی ہیٔت میں لکھا جاتا ہے۔

"غزل" عربی زبان کا لفظ ہے اس کے لغوی معنی عورتوں سے باتیں کرنا، یا عورتوں کے متعلق باتیں کرنا ہیں۔ ہیئت کے اعتبارسے غزل اوزان اور بحورکی رعایت کے ساتھ ساتھ ہم قافیہ اور ہم ردیف مصرعوں سے بنے اشعار کا مجموعہ ہوتی ہے۔