ye daulat bhi le lo ye shohrat bhi le lo

ye daulat bhī le lo ye shohrat bhī le lo

bhale chhīn lo mujh se merī javānī

magar mujh ko lauTā do bachpan kā sāvan

vo kāġhaz kī kashtī vo bārish kā paanī

mohalle kī sab se purānī nishānī

vo buḌhiyā jise bachche kahte the naanī

vo naanī kī bātoñ meñ pariyoñ kā Derā

vo chehre kī jhurriyoñ meñ sadiyoñ kā pherā

bhulā.e nahīñ bhuul saktā hai koī

vo chhoTī sī rāteñ vo lambī kahānī

khaḌī dhuup meñ apne ghar se nikalnā

vo chiḌiyāñ vo bulbul vo titlī pakaḌnā

vo guḌiyā kī shādī meñ laḌnā jhagaḌnā

vo jhūloñ se girnā vo gir ke sambhalnā

vo pītal ke chhalloñ ke pyāre se tohfe

vo TuuTī huī chūḌiyoñ kī nishānī

kabhī ret ke ūñche Tīloñ pe jaanā

gharauñde banānā banā ke miTānā

vo ma.asūm chāhat kī tasvīr apnī

vo ḳhvāboñ-ḳhayāloñ kī jāgīr apnī

na duniyā kā ġham thā na rishtoñ kā bandhan

baḌī ḳhūb-sūrat thī vo zindagānī

ye daulat bhi le lo ye shohrat bhi le lo

bhale chhin lo mujh se meri jawani

magar mujh ko lauTa do bachpan ka sawan

wo kaghaz ki kashti wo barish ka pani

mohalle ki sab se purani nishani

wo buDhiya jise bachche kahte the nani

wo nani ki baaton mein pariyon ka Dera

wo chehre ki jhurriyon mein sadiyon ka phera

bhulae nahin bhul sakta hai koi

wo chhoTi si raaten wo lambi kahani

khaDi dhup mein apne ghar se nikalna

wo chiDiyan wo bulbul wo titli pakaDna

wo guDiya ki shadi mein laDna jhagaDna

wo jhulon se girna wo gir ke sambhalna

wo pital ke chhallon ke pyare se tohfe

wo TuTi hui chuDiyon ki nishani

kabhi ret ke unche Tilon pe jaana

gharaunde banana bana ke miTana

wo masum chahat ki taswir apni

wo KHwabon-KHayalon ki jagir apni

na duniya ka gham tha na rishton ka bandhan

baDi KHub-surat thi wo zindagani