aa ke patthar to mere sahn mein do chaar gire

aa ke patthar to mire sahn meñ do chaar gire

jitne us peḌ ke phal the pas-e-dīvār gire

aisī dahshat thī fazāoñ meñ khule paanī kī

aañkh jhapkī bhī nahīñ haath se patvār gire

mujhe girnā hai to maiñ apne hī qadmoñ meñ girūñ

jis tarah sāya-e-dīvār pe dīvār gire

tīrgī chhoḌ ga.e dil meñ ujāle ke ḳhutūt

ye sitāre mire ghar TuuT ke bekār gire

kyā havā haath meñ talvār liye phirtī thī

kyuuñ mujhe Dhaal banāne ko ye chhitnār gire

dekh kar apne dar-o-bām laraz jaatā huuñ

mire ham-sā.e meñ jab bhī koī dīvār gire

vaqt kī Dor ḳhudā jaane kahāñ se TuuTe

kis ghaḌī sar pe ye laTkī huī talvār gire

ham se Takrā ga.ī ḳhud baḌh ke añdhere kī chaTān

ham sambhal kar jo bahut chalte the nā-chār gire

kyā kahūñ dīda-e-tar ye to mirā chehra hai

sañg kaT jaate haiñ bārish kī jahāñ dhaar gire

haath aayā nahīñ kuchh raat kī daldal ke sivā

haa.e kis moḌ pe ḳhvāboñ ke parastār gire

vo tajallī kī shuā.eñ thiiñ ki jalte hue par

aa.ine TuuT ga.e ā.ina-bardār gire

dekhte kyuuñ ho 'shakeb' itnī bulandī kī taraf

na uThāyā karo sar ko ki ye dastār gire

aa ke patthar to mere sahn mein do chaar gire

jitne us peD ke phal the pas-e-diwar gire

aisi dahshat thi fazaon mein khule pani ki

aankh jhapki bhi nahin hath se patwar gire

mujhe girna hai to main apne hi qadmon mein girun

jis tarah saya-e-diwar pe diwar gire

tirgi chhoD gae dil mein ujale ke KHutut

ye sitare mere ghar TuT ke bekar gire

kya hawa hath mein talwar liye phirti thi

kyun mujhe Dhaal banane ko ye chhitnar gire

dekh kar apne dar-o-baam laraz jata hun

mere ham-sae mein jab bhi koi diwar gire

waqt ki Dor KHuda jaane kahan se TuTe

kis ghaDi sar pe ye laTki hui talwar gire

hum se Takra gai KHud baDh ke andhere ki chaTan

hum sambhal kar jo bahut chalte the na-chaar gire

kya kahun dida-e-tar ye to mera chehra hai

sang kaT jate hain barish ki jahan dhaar gire

hath aaya nahin kuchh raat ki daldal ke siwa

hae kis moD pe KHwabon ke parastar gire

wo tajalli ki shuaen thin ki jalte hue par

aaine TuT gae aaina-bardar gire

dekhte kyun ho 'shakeb' itni bulandi ki taraf

na uThaya karo sar ko ki ye dastar gire