aagahi mein ek KHala maujud hai

āgahī meñ ik ḳhalā maujūd hai

is kā matlab hai ḳhudā maujūd hai

hai yaqīnan kuchh magar vāzeh nahīñ

aap kī āñkhoñ meñ kyā maujūd hai

bāñkpan meñ aur koī shai nahīñ

sādgī kī intihā maujūd hai

hai mukammal bādshāhī kī dalīl

ghar meñ gar ik boriyā maujūd hai

shauqiya koī nahīñ hotā ġhalat

is meñ kuchh terī razā maujūd hai

is liye tanhā huuñ maiñ garm-e-safar

qāfile meñ rahnumā maujūd hai

har mohabbat kī binā hai chāshnī

har lagan meñ mudda.ā maujūd hai

har jagah har shahr har iqlīm meñ

dhuum hai us kī jo nā-maujūd hai

jis se chhupnā chāhtā huuñ maiñ 'adam'

vo sitamgar jā-ba-jā maujūd hai

aagahi mein ek KHala maujud hai

is ka matlab hai KHuda maujud hai

hai yaqinan kuchh magar wazeh nahin

aap ki aankhon mein kya maujud hai

bankpan mein aur koi shai nahin

sadgi ki intiha maujud hai

hai mukammal baadshahi ki dalil

ghar mein gar ek boriya maujud hai

shauqiya koi nahin hota ghalat

is mein kuchh teri raza maujud hai

is liye tanha hun main garm-e-safar

qafile mein rahnuma maujud hai

har mohabbat ki bina hai chashni

har lagan mein muddaa maujud hai

har jagah har shahr har iqlim mein

dhum hai us ki jo na-maujud hai

jis se chhupna chahta hun main 'adam'

wo sitamgar ja-ba-ja maujud hai