andaz hu-ba-hu teri aawaz-e-pa ka tha

andāz hū-ba-hū tirī āvāz-e-pā kā thā

dekhā nikal ke ghar se to jhoñkā havā kā thā

is husn-e-ittifāq pe luT kar bhī shaad huuñ

terī razā jo thī vo taqāzā vafā kā thā

dil raakh ho chukā to chamak aur baḌh ga.ī

ye terī yaad thī ki amal kīmiyā kā thā

is rishta-e-latīf ke asrār kyā khuleñ

tū sāmne thā aur tasavvur ḳhudā kā thā

chhup chhup ke ro.uuñ aur sar-e-anjuman hañsūñ

mujh ko ye mashvara mire dard-āshnā kā thā

uTThā ajab tazād se insān kā ḳhamīr

aadī fanā kā thā to pujārī baqā kā thā

TuuTā to kitne ā.ina-ḳhānoñ pe zad paḌī

aTkā huā gale meñ jo patthar sadā kā thā

hairān huuñ ki vaar se kaise bachā 'nadīm'

vo shaḳhs to ġharīb o ġhayūr intihā kā thā

andaz hu-ba-hu teri aawaz-e-pa ka tha

dekha nikal ke ghar se to jhonka hawa ka tha

is husn-e-ittifaq pe luT kar bhi shad hun

teri raza jo thi wo taqaza wafa ka tha

dil rakh ho chuka to chamak aur baDh gai

ye teri yaad thi ki amal kimiya ka tha

is rishta-e-latif ke asrar kya khulen

tu samne tha aur tasawwur KHuda ka tha

chhup chhup ke roun aur sar-e-anjuman hansun

mujh ko ye mashwara mere dard-ashna ka tha

uTTha ajab tazad se insan ka KHamir

aadi fana ka tha to pujari baqa ka tha

TuTa to kitne aaina-KHanon pe zad paDi

aTka hua gale mein jo patthar sada ka tha

hairan hun ki war se kaise bacha 'nadim'

wo shaKHs to gharib o ghayur intiha ka tha