aaj hi mahfil sard paDi hai aaj hi dard farawan hai

aaj hī mahfil sard paḌī hai aaj hī dard farāvāñ hai

koī to dil kī bāteñ chheḌo yaaro mahfil-e-yārāñ hai

mere har ādarsh kā aalam ab to ālam-e-vīrāñ hai

dil meñ terī tamannā jaise mauj-e-reg-e-bayābāñ hai

paañv thakan se chuur haiñ lekin dil meñ sho.ala-e-imkāñ hai

mere liye ik karb-e-musalsal terā jamāl-e-gurezāñ hai

mujh se milne ke ḳhvāhāñ ho mil kar rone se hāsil

phir vo aag bhaḌak uTThegī ab jo raakh meñ pinhāñ hai

ain-ḳhizāñ meñ havā ne shāyad naam liyā hai bahāroñ kā

Tahnī Tahnī kaañp uTThī hai pattā pattā larzāñ hai

aa to ga.e haiñ aane vaale kaise istiqbāl kareñ

ab vo ābādī suunī hai ab vo gharauñdā vīrāñ hai

tere dukh ko pā kar ham to apnā dukh bhī bhuul ga.e

kis ko ḳhabar thī terī ḳhamoshī tah-dar-tah ik tūfāñ hai

aaj hi mahfil sard paDi hai aaj hi dard farawan hai

koi to dil ki baaten chheDo yaro mahfil-e-yaran hai

mere har aadarsh ka aalam ab to aalam-e-viran hai

dil mein teri tamanna jaise mauj-e-reg-e-bayaban hai

panw thakan se chur hain lekin dil mein shoala-e-imkan hai

mere liye ek karb-e-musalsal tera jamal-e-gurezan hai

mujh se milne ke KHwahan ho mil kar rone se hasil

phir wo aag bhaDak uTThegi ab jo rakh mein pinhan hai

ain-KHizan mein hawa ne shayad nam liya hai bahaaron ka

Tahni Tahni kanp uTThi hai patta patta larzan hai

aa to gae hain aane wale kaise istiqbaal karen

ab wo aabaadi suni hai ab wo gharaunda viran hai

tere dukh ko pa kar hum to apna dukh bhi bhul gae

kis ko KHabar thi teri KHamoshi tah-dar-tah ek tufan hai