aankhen mujhe talwon se wo malne nahin dete

āñkheñ mujhe talvoñ se vo malne nahīñ dete

armān mire dil ke nikalne nahīñ dete

ḳhātir se tirī yaad ko Talne nahīñ dete

sach hai ki hamīñ dil ko sambhalne nahīñ dete

kis naaz se kahte haiñ vo jhuñjhlā ke shab-e-vasl

tum to hameñ karvaT bhī badalne nahīñ dete

parvānoñ ne fānūs ko dekhā to ye bole

kyuuñ ham ko jalāte ho ki jalne nahīñ dete

hairān huuñ kis tarah karūñ arz-e-tamannā

dushman ko to pahlū se vo Talne nahīñ dete

dil vo hai ki fariyād se labrez hai har vaqt

ham vo haiñ ki kuchh muñh se nikalne nahīñ dete

garmi-e-mohabbat meñ vo haiñ aah se māne.a

pankhā nafas-e-sard kā jhalne nahīñ dete

aankhen mujhe talwon se wo malne nahin dete

arman mere dil ke nikalne nahin dete

KHatir se teri yaad ko Talne nahin dete

sach hai ki hamin dil ko sambhalne nahin dete

kis naz se kahte hain wo jhunjhla ke shab-e-wasl

tum to hamein karwaT bhi badalne nahin dete

parwanon ne fanus ko dekha to ye bole

kyun hum ko jalate ho ki jalne nahin dete

hairan hun kis tarah karun arz-e-tamanna

dushman ko to pahlu se wo Talne nahin dete

dil wo hai ki fariyaad se labrez hai har waqt

hum wo hain ki kuchh munh se nikalne nahin dete

garmi-e-mohabbat mein wo hain aah se manea

pankha nafas-e-sard ka jhalne nahin dete