aankhon mein nihan hai jo munajat wo tum ho

āñkhoñ meñ nihāñ hai jo munājāt vo tum ho

jis samt safar meñ hai mirī zaat vo tum ho

jo sāmne hotā hai koī aur hai shāyad

jo dil meñ hai ik ḳhvāb-e-mulāqāt vo tum ho

din aa.e ga.e jaise sarā.e meñ musāfir

Thahrī rahī āñkhoñ meñ jo ik raat vo tum ho

har baat meñ shāmil haiñ tasavvur ke ka.ī rañg

har rañg-e-tasavvur meñ hai jo baat vo tum ho

jab dhuul hue rāh-e-safar meñ to ye jaanā

manzil-gah-e-jāñ haiñ jo maqāmāt vo tum ho

dukh had se jo guzrā to khulā dil pe ki yuuñ bhī

dar-parda hai jo mahv-e-mudārāt vo tum ho

dil-jūī kā andāz bhī narmī bhī vahī hai

siine pe havā rakhtī hai jo haat vo tum ho

baaqī to añdhere hī muhīt-e-dil-o-jāñ haiñ

mahr-o-mah-o-anjum haiñ jo lamhāt vo tum ho

haañ mujh pe sitam bhī haiñ bahut vaqt ke lekin

kuchh vaqt kī haiñ mujh pe ināyāt vo tum ho

aankhon mein nihan hai jo munajat wo tum ho

jis samt safar mein hai meri zat wo tum ho

jo samne hota hai koi aur hai shayad

jo dil mein hai ek KHwab-e-mulaqat wo tum ho

din aae gae jaise sarae mein musafir

Thahri rahi aankhon mein jo ek raat wo tum ho

har baat mein shamil hain tasawwur ke kai rang

har rang-e-tasawwur mein hai jo baat wo tum ho

jab dhul hue rah-e-safar mein to ye jaana

manzil-gah-e-jaan hain jo maqamat wo tum ho

dukh had se jo guzra to khula dil pe ki yun bhi

dar-parda hai jo mahw-e-mudaraat wo tum ho

dil-jui ka andaz bhi narmi bhi wahi hai

sine pe hawa rakhti hai jo hat wo tum ho

baqi to andhere hi muhit-e-dil-o-jaan hain

mahr-o-mah-o-anjum hain jo lamhat wo tum ho

han mujh pe sitam bhi hain bahut waqt ke lekin

kuchh waqt ki hain mujh pe inayat wo tum ho