aap se aap ayan shahid-e-mani hoga

aap se aap ayaañ shāhid-e-ma.anī hogā

ek din gardish-e-aflāk se ye bhī hogā

āñkheñ banvā.iye pahle zarā ai hazrat-e-qais

kyā inhīñ āñkhoñ se nazzāra-e-lailī hogā

shauq meñ dāman-e-yūsuf ke uḌeñge TukḌe

dast-e-gustāḳh se kyā duur hai ye bhī hogā

lākhoñ is husn pe mar jā.eñge dekhā-dekhī

koī ġhash hogā koī mahv-e-tajallī hogā

husn-e-zātī bhī chhupā.e se kahīñ chhuptā hai

saat pardoñ se ayaañ shāhid-e-ma.anī hogā

hosh uḌeñge jo zamāne kī havā bigḌegī

chaar hī din meñ ḳhizāñ gulshan-e-hastī hogā

aur umDegā dil-e-zār jahāñ tak chheḌo

ye bhī kyā koī ḳhazāna hai ki ḳhālī hogā

dil dhaḌakne lagā phir sub.h-e-judā.ī aa.ī

phir vahī dard vahī pahlu-e-ḳhālī hogā

ye to farmā.iye kyā ham meñ rahegā baaqī

dil agar dard-e-mohabbat se bhī ḳhālī hogā

ek chullū se bhī kyā 'yās' rahoge mahrūm

bazm-e-mai hai to koī sāhab-e-dil bhī hogā

aap se aap ayan shahid-e-mani hoga

ek din gardish-e-aflak se ye bhi hoga

aankhen banwaiye pahle zara ai hazrat-e-qais

kya inhin aankhon se nazzara-e-laili hoga

shauq mein daman-e-yusuf ke uDenge TukDe

dast-e-gustaKH se kya dur hai ye bhi hoga

lakhon is husn pe mar jaenge dekha-dekhi

koi ghash hoga koi mahw-e-tajalli hoga

husn-e-zati bhi chhupae se kahin chhupta hai

sat pardon se ayan shahid-e-mani hoga

hosh uDenge jo zamane ki hawa bigDegi

chaar hi din mein KHizan gulshan-e-hasti hoga

aur umDega dil-e-zar jahan tak chheDo

ye bhi kya koi KHazana hai ki KHali hoga

dil dhaDakne laga phir subh-e-judai aai

phir wahi dard wahi pahlu-e-KHali hoga

ye to farmaiye kya hum mein rahega baqi

dil agar dard-e-mohabbat se bhi KHali hoga

ek chullu se bhi kya 'yas' rahoge mahrum

bazm-e-mai hai to koi sahab-e-dil bhi hoga