aashiq-e-gesu-o-qad tere gunahgar hain sab

āshiq-e-gesū-o-qad tere gunahgār haiñ sab

mustahiq daar ke phāñsī ke sazā-vār haiñ sab

paas atibbā ko hai māyūs parastār haiñ sab

tere bīmār-e-mohabbat ke bad-āsār haiñ sab

dil-dahī ke bhī nahīñ tarz se vāqif aslā

ye hasīnān-e-jahāñ naam ko dildār haiñ sab

ab ye sūrat hai mohabbat meñ tumhārī ai jaan

apne begāne mirī shakl se bezār haiñ sab

zulm-e-sayyād sahā jaa.e yakāyak kyūñkar

ham asīrān-e-qafas taaza giraftār haiñ sab

husn yaktā-e-do-ālam hai tirā hī ai dost

terī vahdat ke muqir kāfir-o-dīñ-dār haiñ sab

ek bhī baat na dil le ke nibāheñge huzūr

ye zabānī hī faqat aap ke iqrār haiñ sab

be-zabānī se haiñ majbūr nahīñ sun lete

qaa.il is ābla-pā.ī ke mire ḳhaar haiñ sab

na paḌo fikr-e-dahān-o-kamar-e-yār meñ tum

koī vāqif nahīñ ye ġhaib ke asrār haiñ sab

us meñ tā.ūs-e-chaman ko huī yā kabk-e-darī

ai parī-zād tire Kushta-e-raftār haiñ sab

bārish-e-girya ke hai saath havā āñkhoñ kī

ḳhāna-e-dil kī ḳharābī ke ye āsār haiñ sab

qais-o-farhād ko saudā thā tirā ishq na thā

tere dīvāna-e-jāñ-bāḳhtā hoshiyār haiñ sab

yahī insāf tire ahd meñ hai ai shah-e-husn

vājib-ul-qatl mohabbat ke gunahgār haiñ sab

un butoñ se nahīñ ummīd ḳhudā-tarsī kī

rahm dil un meñ nahīñ ek sitamgār haiñ sab

baat kis tarah dam-e-shikva ho sarsabz apnī

ek apnā nahīñ vaañ un ke taraf-dār haiñ sab

kuchh unheñ qadr nahīñ naqd-e-dil-e-āshiq kī

hasīnān-e-jahāñ zar ke talabgār haiñ sab

kis tavaqqo pe koī bāġh-o-makāñ banvā.e

qabr meñ ek na kaam aa.egā bekār haiñ sab

un dil-āvāroñ ke altāf par ai dil tū na bhuul

rañj kal deñge yahī aaj jo ġham-ḳhvār haiñ sab

fikr-e-īzā meñ mirī kuchh nahīñ tanhā vahī shoḳh

nāz-o-andāz-o-adā aur pa.e āzār haiñ sab

chīda māshūqoñ ke ausāf kiye haiñ mauzūñ

muntaḳhab karne ke qābil mire ash.ār haiñ sab

tujh sā ḳhush-vaz.a ḳhush-andāz na dekhā ab tak

yuuñ to ma.ashūq zamāne ke tarah-dār haiñ sab

bhūle haiñ gardish-e-mīnā-e-falak kā nairañg

ahl-e-zar jitne haiñ mast-e-mai-e-pindār haiñ sab

dostī kar ke 'qalaq' un se bahut pachhtātā

dushman-e-jāñ mire ḳhūbān-e-jafā-kār haiñ sab

aashiq-e-gesu-o-qad tere gunahgar hain sab

mustahiq dar ke phansi ke saza-war hain sab

pas atibba ko hai mayus parastar hain sab

tere bimar-e-mohabbat ke bad-asar hain sab

dil-dahi ke bhi nahin tarz se waqif asla

ye hasinan-e-jahan nam ko dildar hain sab

ab ye surat hai mohabbat mein tumhaari ai jaan

apne begane meri shakl se bezar hain sab

zulm-e-sayyaad saha jae yakayak kyunkar

hum asiran-e-qafas taza giraftar hain sab

husn yakta-e-do-alam hai tera hi ai dost

teri wahdat ke muqir kafir-o-din-dar hain sab

ek bhi baat na dil le ke nibahenge huzur

ye zabani hi faqat aap ke iqrar hain sab

be-zabani se hain majbur nahin sun lete

qail is aabla-pai ke mere KHar hain sab

na paDo fikr-e-dahan-o-kamar-e-yar mein tum

koi waqif nahin ye ghaib ke asrar hain sab

us mein taus-e-chaman ko hui ya kabk-e-dari

ai pari-zad tere Kushta-e-raftar hain sab

barish-e-girya ke hai sath hawa aankhon ki

KHana-e-dil ki KHarabi ke ye aasar hain sab

qais-o-farhad ko sauda tha tera ishq na tha

tere diwana-e-jaan-baKHta hoshiyar hain sab

yahi insaf tere ahd mein hai ai shah-e-husn

wajib-ul-qatl mohabbat ke gunahgar hain sab

un buton se nahin ummid KHuda-tarsi ki

rahm dil un mein nahin ek sitamgar hain sab

baat kis tarah dam-e-shikwa ho sarsabz apni

ek apna nahin wan un ke taraf-dar hain sab

kuchh unhen qadr nahin naqd-e-dil-e-ashiq ki

hasinan-e-jahan zar ke talabgar hain sab

kis tawaqqo pe koi bagh-o-makan banwae

qabr mein ek na kaam aaega bekar hain sab

un dil-awaron ke altaf par ai dil tu na bhul

ranj kal denge yahi aaj jo gham-KHwar hain sab

fikr-e-iza mein meri kuchh nahin tanha wahi shoKH

naz-o-andaz-o-ada aur pae aazar hain sab

chida mashuqon ke ausaf kiye hain mauzun

muntaKHab karne ke qabil mere ashaar hain sab

tujh sa KHush-waza KHush-andaz na dekha ab tak

yun to mashuq zamane ke tarah-dar hain sab

bhule hain gardish-e-mina-e-falak ka nairang

ahl-e-zar jitne hain mast-e-mai-e-pindar hain sab

dosti kar ke 'qalaq' un se bahut pachhtata

dushman-e-jaan mere KHuban-e-jafa-kar hain sab