aasman ka sard sannaTa pighalta jaega

āsmāñ kā sard sannāTā pighaltā jā.egā

aañkh khultī jā.egī manzar badaltā jā.egā

phailtī jā.egī chāroñ samt ik ḳhush-raunaqī

ek mausam mere andar se nikaltā jā.egā

merī rāhoñ meñ hasīñ kirneñ bikhartī jā.eñgī

āḳhirī taarā pas-e-kohsār Dhaltā jā.egā

bhūltā jā.ūñgā guzrī sā'atoñ ke hādse

qahr-e-ā.inda bhī mere sar se Taltā jā.egā

raah ab koī ho manzil kī taraf le jā.egī

paañv ab kaisā paḌe ḳhud hī sañbhaltā jā.egā

ik samāñ khultā huā sā ik fazā be-dāġh sī

ab yahī manzar mire ham-rāh chaltā jā.egā

chhū sakegī ab na mere haath tūfānī havā

jis diye ko ab jalā dūñgā vo jaltā jā.egā

aasman ka sard sannaTa pighalta jaega

aankh khulti jaegi manzar badalta jaega

phailti jaegi chaaron samt ek KHush-raunaqi

ek mausam mere andar se nikalta jaega

meri rahon mein hasin kirnen bikharti jaengi

aaKHiri tara pas-e-kohsar Dhalta jaega

bhulta jaunga guzri sa'aton ke hadse

qahr-e-ainda bhi mere sar se Talta jaega

rah ab koi ho manzil ki taraf le jaegi

panw ab kaisa paDe KHud hi sanbhalta jaega

ek saman khulta hua sa ek faza be-dagh si

ab yahi manzar mere ham-rah chalta jaega

chhu sakegi ab na mere hath tufani hawa

jis diye ko ab jala dunga wo jalta jaega