ab bhi ek umr pe jine ka na andaz aaya

ab bhī ik umr pe jiine kā na andāz aayā

zindagī chhoḌ de pīchhā mirā maiñ baaz aayā

muzhda ai ruuh tujhe ishq sā dam-sāz aayā

nakbat-e-faqr ga.ī shāh-e-sar-afrāz aayā

paas apne jo nayā koī fusūñ-sāz aayā

ho rahe us ke hameñ yaad tirā naaz aayā

piite piite tirī ik umr kaTī us par bhī

piine vaale tujhe piine kā na andāz aayā

dil ho yā ruuh o jigar kaan khaḌe sab ke hue

ishq aayā ki koī mufsida-pardāz aayā

le rahā hai dar-e-mai-ḳhāna pe sun-gun vaa.iz

rindo hushyār ki ik mufsida-pardāz aayā

dil-e-majbūr pe is tarah se pahuñchī vo nigāh

jaise usfūr pe par tol ke shahbāz aayā

kyuuñ hai ḳhāmosh dilā kis se ye sargoshī hai

maut aa.ī ki tire vāste hamrāz aayā

dekh lo ashk-e-tavātur ko na pūchho mirā haal

chup raho chup raho is bazm meñ ġhammāz aayā

is ḳharābe meñ to ham donoñ haiñ yaksāñ saaqī

ham ko piine tujhe dene kā na andāz aayā

naala aatā nahīñ kan-ras hai faqat ai bulbul

mard-e-sayyāh huuñ sun kar tirī āvāz aayā

dil jo ghabrā.e qafas meñ to zarā par kholūñ

zor itnā bhī na ai hasrat-e-parvāz aayā

dekhiye nāla-e-dil jā ke lagā.e kis se

jis kā khaTkā thā vahī mufsida-pardāz aayā

mudda.ī basta-zabāñ kyuuñ na ho sun kar mire sher

kyā chale sehr kī jab sāhib-e-ejāz aayā

rind phailā.e haiñ chullū ko takalluf kaisā

sāqiyā Dhaal bhī de jaam ḳhudā-sāz aayā

na gayā par na gayā sham.a kā ronā kisī haal

go ki parvāna-e-marhūm sā dam-sāz aayā

ek chupkī meñ gulū tum ne nikāle sab kaam

ġhamza aayā na karishma na tumheñ naaz aayā

dhyān rah rah ke udhar kā mujhe dilvātā hai

dam na aayā mire tan meñ koī dam-sāz aayā

kis tarah maut ko samjhūñ na hayāt-e-abadī

aap aa.e ki koī sāhib-e-ejāz aayā

be-'anīs' ab chaman-e-nazm hai vīrāñ ai 'shād'

haa.e aisā na koī zamzama-pardāz aayā

ab bhi ek umr pe jine ka na andaz aaya

zindagi chhoD de pichha mera main baz aaya

muzhda ai ruh tujhe ishq sa dam-saz aaya

nakbat-e-faqr gai shah-e-sar-afraaz aaya

pas apne jo naya koi fusun-saz aaya

ho rahe us ke hamein yaad tera naz aaya

pite pite teri ek umr kaTi us par bhi

pine wale tujhe pine ka na andaz aaya

dil ho ya ruh o jigar kan khaDe sab ke hue

ishq aaya ki koi mufsida-pardaz aaya

le raha hai dar-e-mai-KHana pe sun-gun waiz

rindo hushyar ki ek mufsida-pardaz aaya

dil-e-majbur pe is tarah se pahunchi wo nigah

jaise usfur pe par tol ke shahbaz aaya

kyun hai KHamosh dila kis se ye sargoshi hai

maut aai ki tere waste hamraaz aaya

dekh lo ashk-e-tawatur ko na puchho mera haal

chup raho chup raho is bazm mein ghammaz aaya

is KHarabe mein to hum donon hain yaksan saqi

hum ko pine tujhe dene ka na andaz aaya

nala aata nahin kan-ras hai faqat ai bulbul

mard-e-sayyah hun sun kar teri aawaz aaya

dil jo ghabrae qafas mein to zara par kholun

zor itna bhi na ai hasrat-e-parwaz aaya

dekhiye nala-e-dil ja ke lagae kis se

jis ka khaTka tha wahi mufsida-pardaz aaya

muddai basta-zaban kyun na ho sun kar mere sher

kya chale sehr ki jab sahib-e-ejaz aaya

rind phailae hain chullu ko takalluf kaisa

saqiya Dhaal bhi de jam KHuda-saz aaya

na gaya par na gaya shama ka rona kisi haal

go ki parwana-e-marhum sa dam-saz aaya

ek chupki mein gulu tum ne nikale sab kaam

ghamza aaya na karishma na tumhein naz aaya

dhyan rah rah ke udhar ka mujhe dilwata hai

dam na aaya mere tan mein koi dam-saz aaya

kis tarah maut ko samjhun na hayat-e-abadi

aap aae ki koi sahib-e-ejaz aaya

be-'anis' ab chaman-e-nazm hai viran ai 'shad'

hae aisa na koi zamzama-pardaz aaya