ab yahi ranj-e-be-dili mujhko miTae ya banae

ab yahī ranj-e-be-dilī mujh ko miTā.e yā banā.e

laakh vo mehrbāñ sahī us kī taraf bhī kaun jaa.e

rūThe hue vujūd bhī dard-e-anā se kam nahīñ

kyuuñ maiñ kisī ke naaz uThā.ūñ mujh ko bhī koī kyuuñ manā.e

sāya-e-qurb meñ mileñ aa vahī donoñ vaqt phir

hoñT pe sub.h jagmagā.e aañkh meñ shaam muskurā.e

din ko dayār-e-dīd meñ vus.at-e-lams se gurez

shab ko hisār-e-chashm meñ ḳhud hī misl-e-ḳhvāb aa.e

ḳhatm haiñ vāqi'āt bhī ziist kī vārdāt bhī

ab vo jhukī jhukī nazar ḳhud koī dāstāñ sunā.e

mūnis-e-ḳhalvat-e-vafā aaj bhī hai vo dil ki jo

sham' kī lau meñ thartharā.e chāñd ke saath Duub jaa.e

maut ke baa'd ziist kī bahs meñ mubtalā the log

ham to 'sahar' guzar ga.e tohmat-e-zindagī uThā.e

ab yahi ranj-e-be-dili mujh ko miTae ya banae

lakh wo mehrban sahi us ki taraf bhi kaun jae

ruThe hue wujud bhi dard-e-ana se kam nahin

kyun main kisi ke naz uThaun mujh ko bhi koi kyun manae

saya-e-qurb mein milen aa wahi donon waqt phir

honT pe subh jagmagae aankh mein sham muskurae

din ko dayar-e-did mein wusat-e-lams se gurez

shab ko hisar-e-chashm mein KHud hi misl-e-KHwab aae

KHatm hain waqi'at bhi zist ki wardat bhi

ab wo jhuki jhuki nazar KHud koi dastan sunae

munis-e-KHalwat-e-wafa aaj bhi hai wo dil ki jo

sham' ki lau mein thartharae chand ke sath Dub jae

maut ke ba'd zist ki bahs mein mubtala the log

hum to 'sahar' guzar gae tohmat-e-zindagi uThae