abhi to aap hi hail hai rasta shab ka

abhī to aap hī haa.il hai rāstā shab kā

qarīb aa.e to dekheñge hausla shab kā

chalī to aa.ī thī kuchh duur saath saath mire

phir is ke ba.ad ḳhudā jaane kyā huā shab kā

mire ḳhayāl ke vahshat-kade meñ aate hī

junūñ kī nok se phūTā hai aabla shab kā

sahar kī pahlī kiran ne use bikher diyā

mujhe sameTne aayā thā jab ḳhudā shab kā

zamīñ pe aa ke sitāroñ ne ye kahā mujh se

tire qarīb se guzrā hai qāfila shab kā

sahar kā lams mirī zindagī baḌhā detā

magar garāñ thā bahut mujh pe kāTnā shab kā

kabhī kabhī to ye vahshat bhī ham pe guzrī hai

ki dil ke saath hī dekhā hai Dūbnā shab kā

chaTaḳh uThī hai rag-e-jāñ to ye ḳhayāl aayā

kisī kī yaad se juḌtā hai silsila shab kā

abhi to aap hi hail hai rasta shab ka

qarib aae to dekhenge hausla shab ka

chali to aai thi kuchh dur sath sath mere

phir is ke baad KHuda jaane kya hua shab ka

mere KHayal ke wahshat-kade mein aate hi

junun ki nok se phuTa hai aabla shab ka

sahar ki pahli kiran ne use bikher diya

mujhe sameTne aaya tha jab KHuda shab ka

zamin pe aa ke sitaron ne ye kaha mujh se

tere qarib se guzra hai qafila shab ka

sahar ka lams meri zindagi baDha deta

magar garan tha bahut mujh pe kaTna shab ka

kabhi kabhi to ye wahshat bhi hum pe guzri hai

ki dil ke sath hi dekha hai Dubna shab ka

chaTaKH uThi hai rag-e-jaan to ye KHayal aaya

kisi ki yaad se juDta hai silsila shab ka