achchha jo KHafa humse ho tum ai sanam achchha

achchhā jo ḳhafā ham se ho tum ai sanam achchhā

lo ham bhī na boleñge ḳhudā kī qasam achchhā

mashġhūl kiyā chāhiye is dil ko kisī taur

le leveñge DhūñD aur koī yaar ham achchhā

garmī ne kuchh aag aur bhī siine meñ lagā.ī

har taur ġharaz aap se milnā hī kam achchhā

aġhyār se karte ho mire sāmne bāteñ

mujh par ye lage karne nayā tum sitam achchhā

ham mo.atakif-e-ḳhalvat-e-but-ḳhāna haiñ ai shaiḳh

jaatā hai to jā tū pa.e-tauf-e-haram achchhā

jo shaḳhs muqīm-e-rah-e-dildār haiñ zāhid

firdaus lage un ko na bāġh-e-iram achchhā

kah kar ga.e aatā huuñ koī dam ko abhī maiñ

phir de chale kal kī sī tarah mujh ko dam achchhā

is hasti-e-mauhūm se maiñ tañg huuñ 'inshā'

vallāh ki is se ba-marātib adam achchhā

achchha jo KHafa hum se ho tum ai sanam achchha

lo hum bhi na bolenge KHuda ki qasam achchha

mashghul kiya chahiye is dil ko kisi taur

le lewenge DhunD aur koi yar hum achchha

garmi ne kuchh aag aur bhi sine mein lagai

har taur gharaz aap se milna hi kam achchha

aghyar se karte ho mere samne baaten

mujh par ye lage karne naya tum sitam achchha

hum moatakif-e-KHalwat-e-but-KHana hain ai shaiKH

jata hai to ja tu pae-tauf-e-haram achchha

jo shaKHs muqim-e-rah-e-dildar hain zahid

firdaus lage un ko na bagh-e-iram achchha

kah kar gae aata hun koi dam ko abhi main

phir de chale kal ki si tarah mujh ko dam achchha

is hasti-e-mauhum se main tang hun 'insha'

wallah ki is se ba-maraatib adam achchha