agar marte hue lab par na tera nam aaega

agar marte hue lab par na terā naam aa.egā

to maiñ marne se dar-guzrā mire kis kaam aa.egā

use bhī Thaan rakh saaqī yaqīñ hogā na rindoñ ko

agar zāhid pahan kar jāma-e-ehrām aa.egā

shab-e-furqat meñ dard-e-dil se maiñ us vāste ḳhush huuñ

zabāñ par raat bhar rah rah ke terā naam aa.egā

lagī ho kuchh to qāsid āḳhir is kam-baḳht dil meñ bhī

vahāñ terī tarah jo jā.egā nākām aa.egā

isī ummīd meñ bāñdhe hue haiñ TakTakī mai-kash

kaf-e-nāzuk pe saaqī rakh ke ik din jaam aa.egā

yahāñ apnī paḌī hai tujh se ai ġham-ḳhvār kyā uljhūñ

ye kaun ārām hai mar jā.ūñ tab ārām aa.egā

zahe izzat jo ho is bazm meñ mazkūr ai vaa.iz

balā se gar gunahgāroñ meñ apnā naam aa.egā

hazār inkār yā qat-e-ta.alluq us se kar nāseh

magar hir-phir ke hoñToñ par usī kā naam aa.egā

atā kī jab ki ḳhud pīr-e-muġhāñ ne pī bhī le zāhid

ye kaisā sochnā hai tujh pe kyuuñ ilzām aa.egā

paḌā hai silsila taqdīr kā sayyād ke bas meñ

chaman meñ ai sabā kyūñkar asīr-e-dām aa.egā

koī badmast ko detā hai saaqī bhar ke paimāna

tirā kyā jā.egā mujh par abas ilzām aa.egā

unheñ dekhegī tū ai chashm-e-hasrat vasl meñ yā maiñ

tire kaam aa.egā ronā ki mere kaam aa.egā

hamesha kyā piyūñgā maiñ isī kohna-sifālī maiñ

mire aage kabhī to sāġhar-e-zarfām aa.egā

kahāñ se lā.ūñ sabr-e-hazrat-e-ayyūb ai saaqī

ḳhum aa.egā surāhī aa.egī tab jaam aa.egā

chhurī thī kund terī yā tire qātil kī o bismil

taḌap bhī tū tirī gardan pe kyuuñ ilzām aa.egā

yahī kah kar ajal ko qarz-ḳhvāhoñ kī tarah Taalā

ki le kar aaj qāsid yaar kā paiġhām aa.egā

hamesha kyā yuuñ hī qismat meñ hai gintī ginā denā

koī naala na lab par lā.iq-e-anjām aa.egā

galī meñ yaar kī ai 'shād' sab mushtāq baiThe haiñ

ḳhudā jaane vahāñ se hukm kis ke naam aa.egā

agar marte hue lab par na tera nam aaega

to main marne se dar-guzra mere kis kaam aaega

use bhi Than rakh saqi yaqin hoga na rindon ko

agar zahid pahan kar jama-e-ehram aaega

shab-e-furqat mein dard-e-dil se main us waste KHush hun

zaban par raat bhar rah rah ke tera nam aaega

lagi ho kuchh to qasid aaKHir is kam-baKHt dil mein bhi

wahan teri tarah jo jaega nakaam aaega

isi ummid mein bandhe hue hain TakTaki mai-kash

kaf-e-nazuk pe saqi rakh ke ek din jam aaega

yahan apni paDi hai tujh se ai gham-KHwar kya uljhun

ye kaun aaram hai mar jaun tab aaram aaega

zahe izzat jo ho is bazm mein mazkur ai waiz

bala se gar gunahgaron mein apna nam aaega

hazar inkar ya qat-e-talluq us se kar naseh

magar hir-phir ke honTon par usi ka nam aaega

ata ki jab ki KHud pir-e-mughan ne pi bhi le zahid

ye kaisa sochna hai tujh pe kyun ilzam aaega

paDa hai silsila taqdir ka sayyaad ke bas mein

chaman mein ai saba kyunkar asir-e-dam aaega

koi badmast ko deta hai saqi bhar ke paimana

tera kya jaega mujh par abas ilzam aaega

unhen dekhegi tu ai chashm-e-hasrat wasl mein ya main

tere kaam aaega rona ki mere kaam aaega

hamesha kya piyunga main isi kohna-sifali main

mere aage kabhi to saghar-e-zarfam aaega

kahan se laun sabr-e-hazrat-e-ayyub ai saqi

KHum aaega surahi aaegi tab jam aaega

chhuri thi kund teri ya tere qatil ki o bismil

taDap bhi tu teri gardan pe kyun ilzam aaega

yahi kah kar ajal ko qarz-KHwahon ki tarah Tala

ki le kar aaj qasid yar ka paigham aaega

hamesha kya yun hi qismat mein hai ginti gina dena

koi nala na lab par laiq-e-anjam aaega

gali mein yar ki ai 'shad' sab mushtaq baiThe hain

KHuda jaane wahan se hukm kis ke nam aaega