ai bujhe rangon ki sham ab tak dhuan aisa na tha

ai bujhe rañgoñ kī shaam ab tak dhuāñ aisā na thā

aaj ghar kī chhat se dekhā āsmāñ aisā na thā

kab se hai girte hue pattoñ kā manzar aañkh meñ

jaane kyā mausam hai ḳhvāboñ kā ziyāñ aisā na thā

koī shai lahrā hī jaatī thī fasīl-e-shab ke paar

duur ufuq meñ dekhnā kuchh rā.egāñ aisā na thā

peḌ the saa.e the pagDanDī thī ik jaatī huī

kyā ye sab kuchh ḳhvāb thā sach-much yahāñ aisā na thā

fāsla kam karne vaale rāste shāyad na the

ab to lagtā hai safar hī darmiyāñ aisā na thā

dil ki thā maa.il bahut vīrāñ jazīroñ kī taraf

ye havā aisī na thī ye bādbāñ aisā na thā

koī gosha ḳhvāb kā sā DhūñD hī lete the ham

shahr apnā shahr 'bānī' be-amāñ aisā na thā

ai bujhe rangon ki sham ab tak dhuan aisa na tha

aaj ghar ki chhat se dekha aasman aisa na tha

kab se hai girte hue patton ka manzar aankh mein

jaane kya mausam hai KHwabon ka ziyan aisa na tha

koi shai lahra hi jati thi fasil-e-shab ke par

dur ufuq mein dekhna kuchh raegan aisa na tha

peD the sae the pagDanDi thi ek jati hui

kya ye sab kuchh KHwab tha sach-much yahan aisa na tha

fasla kam karne wale raste shayad na the

ab to lagta hai safar hi darmiyan aisa na tha

dil ki tha mail bahut viran jaziron ki taraf

ye hawa aisi na thi ye baadban aisa na tha

koi gosha KHwab ka sa DhunD hi lete the hum

shahr apna shahr 'bani' be-aman aisa na tha