ai zauq waqt nale ke rakh le jigar pe hath

ai 'zauq' vaqt naale ke rakh le jigar pe haath

varna jigar ko ro.egā tū dhar ke sar pe haath

chhoḌā na dil meñ sabr na ārām ne qarār

terī nigah ne saaf kiyā ghar ke ghar pe haath

khaa.e hai is maze se ġham-e-ishq merā dil

jaise gurisna maare hai halvā-e-tar pe haath

ḳhat de ke chāhtā thā zabānī bhī kuchh kahe

rakkhā magar kisī ne dil-e-nāma-bar pe haath

juuñ pañch-shāḳha tū na jalā uñgliyāñ tabīb

rakh rakh ke nabz-e-āshiq-e-tafta-jigar pe haath

qātil ye kyā sitam hai ki uThtā nahīñ kabhī

aa kar mazār-e-kushta-e-teġh-e-nazar pe haath

maiñ nā-tavāñ huuñ ḳhaak kā parvāne kī ġhubār

uThtā huuñ rakh ke dosh-e-nasīm-e-sahar pe haath

ai sham.a ek chor hai baadī ye bād-e-sub.h

maare hai koī dam meñ tire tāj-e-zar pe haath

ai 'zauq' maiñ to baiTh gayā dil ko thaam kar

is naaz se khaḌe the vo rakh kar kamar pe haath

ai 'zauq' waqt nale ke rakh le jigar pe hath

warna jigar ko roega tu dhar ke sar pe hath

chhoDa na dil mein sabr na aaram ne qarar

teri nigah ne saf kiya ghar ke ghar pe hath

khae hai is maze se gham-e-ishq mera dil

jaise gurisna mare hai halwa-e-tar pe hath

KHat de ke chahta tha zabani bhi kuchh kahe

rakkha magar kisi ne dil-e-nama-bar pe hath

jun panch-shaKHa tu na jala ungliyan tabib

rakh rakh ke nabz-e-ashiq-e-tafta-jigar pe hath

qatil ye kya sitam hai ki uThta nahin kabhi

aa kar mazar-e-kushta-e-tegh-e-nazar pe hath

main na-tawan hun KHak ka parwane ki ghubar

uThta hun rakh ke dosh-e-nasim-e-sahar pe hath

ai shama ek chor hai baadi ye baad-e-subh

mare hai koi dam mein tere taj-e-zar pe hath

ai 'zauq' main to baiTh gaya dil ko tham kar

is naz se khaDe the wo rakh kar kamar pe hath