ajib tajraba tha bhiD se guzarne ka

ajiib tajraba thā bhiiḌ se guzarne kā

use bahāna milā mujh se baat karne kā

phir ek mauj-e-tah-e-āb us ko khīñch ga.ī

tamāsha ḳhatm huā Dūbne ubharne kā

mujhe ḳhabar hai ki rasta mazār chāhtā hai

maiñ ḳhasta-pā sahī lekin nahīñ Thaharne kā

thamā ke ek bikhartā gulāb mere haath

tamāsha dekh rahā hai vo mere Darne kā

ye āsmāñ meñ siyāhī bikher dī kis ne

hameñ thā shauq bahut us meñ rañg bharne kā

khaḌe hoñ dost ki dushman safeñ sab ek sī haiñ

vo jāntā hai idhar se nahīñ guzarne kā

nigāh ham-safaroñ par rakhūñ sar-e-manzil

ki marhala hai ye ik dūsre se Darne kā

lapak lapak ke vahīñ Dher ho ga.e āḳhir

jatan kiyā to bahut sat.h se ubharne kā

karāñ karāñ na sazā koī sair karne kī

safar safar na koī hādsa guzarne kā

kisī maqām se koī ḳhabar na aane kī

koī jahāz zamīñ par na ab utarne kā

koī sadā na samā.at pe naqsh hone kī

na koī aks mirī aañkh meñ Thaharne kā

na ab havā mare siine meñ sansanāne kī

na koī zahr mirī ruuh meñ utarne kā

koī bhī baat na mujh ko udaas karne kī

koī sulūk na mujh pe girāñ guzarne kā

bas ek chīḳh girī thī pahāḌ se yak-laḳht

ajab nazāra thā phir dhund ke bikharne kā

ajib tajraba tha bhiD se guzarne ka

use bahana mila mujh se baat karne ka

phir ek mauj-e-tah-e-ab us ko khinch gai

tamasha KHatm hua Dubne ubharne ka

mujhe KHabar hai ki rasta mazar chahta hai

main KHasta-pa sahi lekin nahin Thaharne ka

thama ke ek bikharta gulab mere hath

tamasha dekh raha hai wo mere Darne ka

ye aasman mein siyahi bikher di kis ne

hamein tha shauq bahut us mein rang bharne ka

khaDe hon dost ki dushman safen sab ek si hain

wo jaanta hai idhar se nahin guzarne ka

nigah ham-safaron par rakhun sar-e-manzil

ki marhala hai ye ek dusre se Darne ka

lapak lapak ke wahin Dher ho gae aaKHir

jatan kiya to bahut sath se ubharne ka

karan karan na saza koi sair karne ki

safar safar na koi hadsa guzarne ka

kisi maqam se koi KHabar na aane ki

koi jahaz zamin par na ab utarne ka

koi sada na samaat pe naqsh hone ki

na koi aks meri aankh mein Thaharne ka

na ab hawa mare sine mein sansanane ki

na koi zahr meri ruh mein utarne ka

koi bhi baat na mujh ko udas karne ki

koi suluk na mujh pe giran guzarne ka

bas ek chiKH giri thi pahaD se yak-laKHt

ajab nazara tha phir dhund ke bikharne ka