aks-e-ruKH-e-gulgun se tamasha nazar aaya

aks-e-ruḳh-e-gulgūñ se tamāshā nazar aayā

ā.īna unhīñ phūloñ kā duunā nazar aayā

ḳhūbī meñ do-bālā vo sarāpā nazar aayā

pur-nūr badan paikar-e-jauzā nazar aayā

dil ḳhush guhroñ kā hameñ sahrā nazar aayā

kyā gard-e-yatīmī kā bagūlā nazar aayā

nairañgī-e-hairat se ravāñ rahte haiñ aañsū

tasvīr kā dariyā hameñ bahtā nazar aayā

niklā jo havā-vār meñ vo rashk-e-sulaimāñ

uḌtā sū-e-aflāk farishta nazar aayā

bālīda hai har shīsha-e-mai ab kī yahāñ tak

ek ek falak pamba-e-mīnā nazar aayā

ḳhil.at mujhe vahshat ne diyā vus.at-e-dil kā

jaame meñ mire dāman-e-sahrā nazar aayā

nazroñ meñ ye chhāyā hai ġhubār-e-dil-e-vahshī

har aañkh meñ aañsū mujhe Dhelā nazar aayā

vo ā.ina-sīmā hai dil-e-saḳht-adū meñ

botal meñ utarte hue shīsha nazar aayā

āshiq tire palkoñ kā huā zinda-e-jāved

suulī kā ḳharīdār masīhā nazar aayā

zāhid ne bhī aqd aaj kiyā bint-e-inab se

juft-e-bat-e-mai murġh-e-musallā nazar aayā

bargashta-nasībī-e-sadaf-e-dil kī kahūñ kyā

motī ke evaz is meñ phaphūlā nazar aayā

ā.īna-e-getī meñ vahī aks hai har sū

ham ne jidhar us shoḳh ko dekhā nazar aayā

karte ho mire paikar-e-vahmī ko nishāna

nāvak meñ tumhāre par-e-anqā nazar aayā

us but ke nahāne se huā saaf ye paanī

motī bhī sadaf meñ tah-e-dariyā nazar aayā

us huur kī rañgat uḌī rone se hamāre

rañg-e-gul-e-firdaus bhī kachchā nazar aayā

shīsha mai-e-gulgūñ kā unheñ madd-e-nazar hai

teġh-e-nigah-e-mast meñ chhālā nazar aayā

ho jā.eñge sab koh-e-jahāñ sañg-e-falāḳhan

vahshat meñ jo aalam tah-o-bālā nazar aayā

sham.eñ jo bujhīñ bazm-e-tilismāt ko dekhā

āñkheñ jo huiiñ band to kyā kyā nazar aayā

kyuuñ ḳhush na ho til baiTh ke mīzān-e-falak meñ

mauzūn-e-qad-e-yār kā pallā nazar aayā

mil mil ga.e haiñ ḳhaak meñ lākhoñ dil-e-raushan

har zarra mujhe arsh kā taarā nazar aayā

āñkhoñ meñ khaTaktī hai yahī daulat-e-duniyā

har sikke kī machhlī meñ bhī kāñTā nazar aayā

hai būd-e-jahāñ naqsh sar-e-āb nazar meñ

ye khel hameñ ban ke bigaḌtā nazar aayā

hairat-kada-e-dahr huā mujh se mukaddar

ā.īna-e-ījād meñ dhabbā nazar aayā

ḳhush aate nahīñ daañt kisī huur ke mujh ko

chāk-e-gul-e-firdaus meñ baḳhiya nazar aayā

muddat se nazar-doḳhta rahte haiñ giraftār

gesū kī bhī zanjīr meñ Tāñkā nazar aayā

champā-kalī us mast-e-mai-e-husn kī dekhī

gardan kī surāhī kā ye miinā nazar aayā

madfūn huā zer-e-zamīñ aap kā lāġhar

chashm-e-lahad-e-tañg meñ jaalā nazar aayā

kalkatta meñ har dam hai 'munīr' aap ko vahshat

har koThī meñ har bañgle meñ jañglā nazar aayā

aks-e-ruKH-e-gulgun se tamasha nazar aaya

aaina unhin phulon ka duna nazar aaya

KHubi mein do-baala wo sarapa nazar aaya

pur-nur badan paikar-e-jauza nazar aaya

dil KHush guhron ka hamein sahra nazar aaya

kya gard-e-yatimi ka bagula nazar aaya

nairangi-e-hairat se rawan rahte hain aansu

taswir ka dariya hamein bahta nazar aaya

nikla jo hawa-war mein wo rashk-e-sulaiman

uDta su-e-aflak farishta nazar aaya

baalida hai har shisha-e-mai ab ki yahan tak

ek ek falak pamba-e-mina nazar aaya

KHilat mujhe wahshat ne diya wusat-e-dil ka

jame mein mere daman-e-sahra nazar aaya

nazron mein ye chhaya hai ghubar-e-dil-e-wahshi

har aankh mein aansu mujhe Dhela nazar aaya

wo aaina-sima hai dil-e-saKHt-adu mein

botal mein utarte hue shisha nazar aaya

aashiq tere palkon ka hua zinda-e-jawed

suli ka KHaridar masiha nazar aaya

zahid ne bhi aqd aaj kiya bint-e-inab se

juft-e-bat-e-mai murgh-e-musalla nazar aaya

bargashta-nasibi-e-sadaf-e-dil ki kahun kya

moti ke ewaz is mein phaphula nazar aaya

aaina-e-geti mein wahi aks hai har su

hum ne jidhar us shoKH ko dekha nazar aaya

karte ho mere paikar-e-wahmi ko nishana

nawak mein tumhaare par-e-anqa nazar aaya

us but ke nahane se hua saf ye pani

moti bhi sadaf mein tah-e-dariya nazar aaya

us hur ki rangat uDi rone se hamare

rang-e-gul-e-firdaus bhi kachcha nazar aaya

shisha mai-e-gulgun ka unhen madd-e-nazar hai

tegh-e-nigah-e-mast mein chhaala nazar aaya

ho jaenge sab koh-e-jahan sang-e-falaKHan

wahshat mein jo aalam tah-o-baala nazar aaya

shamen jo bujhin bazm-e-tilismat ko dekha

aankhen jo huin band to kya kya nazar aaya

kyun KHush na ho til baiTh ke mizan-e-falak mein

mauzun-e-qad-e-yar ka palla nazar aaya

mil mil gae hain KHak mein lakhon dil-e-raushan

har zarra mujhe arsh ka tara nazar aaya

aankhon mein khaTakti hai yahi daulat-e-duniya

har sikke ki machhli mein bhi kanTa nazar aaya

hai bud-e-jahan naqsh sar-e-ab nazar mein

ye khel hamein ban ke bigaDta nazar aaya

hairat-kada-e-dahr hua mujh se mukaddar

aaina-e-ijad mein dhabba nazar aaya

KHush aate nahin dant kisi hur ke mujh ko

chaak-e-gul-e-firdaus mein baKHiya nazar aaya

muddat se nazar-doKHta rahte hain giraftar

gesu ki bhi zanjir mein Tanka nazar aaya

champa-kali us mast-e-mai-e-husn ki dekhi

gardan ki surahi ka ye mina nazar aaya

madfun hua zer-e-zamin aap ka laghar

chashm-e-lahad-e-tang mein jala nazar aaya

kalkatta mein har dam hai 'munir' aap ko wahshat

har koThi mein har bangle mein jangla nazar aaya