apna jaisa bhi haal rakkha hai

apnā jaisā bhī haal rakkhā hai

tere ġham ko nihāl rakkhā hai

shā.erī kyā hai ham ne jiine kā

ek rasta nikāl rakkhā hai

ham ne ghar kī salāmtī ke liye

ḳhud ko ghar se nikāl rakkhā hai

mere andar jo sar-phirā hai use

maiñ ne zindāñ meñ Daal rakkhā hai

ek chehra hai ham ne jis ke liye

ā.inoñ kā ḳhayāl rakhā hai

is baras kā bhī naam ham ne to

terī yādoñ kā saal rakkhā hai

girte girte bhī ham ne hāthoñ par

āsmāñ ko sambhāl rakkhā hai

kyā ḳhabar shīshagar ne kyuuñ 'az.har'

mere shīshe meñ baal rakkhā hai

apna jaisa bhi haal rakkha hai

tere gham ko nihaal rakkha hai

shaeri kya hai hum ne jine ka

ek rasta nikal rakkha hai

hum ne ghar ki salamti ke liye

KHud ko ghar se nikal rakkha hai

mere andar jo sar-phira hai use

main ne zindan mein Dal rakkha hai

ek chehra hai hum ne jis ke liye

aainon ka KHayal rakha hai

is baras ka bhi nam hum ne to

teri yaadon ka sal rakkha hai

girte girte bhi hum ne hathon par

aasman ko sambhaal rakkha hai

kya KHabar shishagar ne kyun 'azhar'

mere shishe mein baal rakkha hai