asrar-e-ishq hai dil-e-muztar liye hue

asrār-e-ishq hai dil-e-muztar liye hue

qatra hai be-qarār samundar liye hue

āshob-e-dahr o fitna-e-mahshar liye hue

pahlū meñ ya.anī ho dil-e-muztar liye hue

mauj-e-nashīm-e-sub.h ke qurbān jā.iye

aa.ī hai bū-e-zulf-e-mo.ambar liye hue

kyā mastiyāñ chaman meñ haiñ josh-e-bahār se

har shāḳh-e-gul hai haath meñ sāġhar liye hue

qātil nigāh-e-yās kī zad se na bach sakā

ḳhanjar the ham bhī ik tah-e-ḳhanjar liye hue

ḳhīra kiye hai chashm-e-haqīqat-shanās bhī

har zarra ek mehr-e-munavvar liye hue

pahlī nazar bhī aap kī uff kis balā kī thī

ham aaj tak vo choT haiñ dil par liye hue

tasvīr hai khiñchī huī nāz-o-niyāz kī

maiñ sar jhukā.e aur vo ḳhanjar liye hue

sahbā-e-tund-o-tez ko saaqī sambhālnā

uchhle kahīñ na shīsha-o-sāġhar liye hue

maiñ kyā kahūñ kahāñ hai mohabbat kahāñ nahīñ

rag rag meñ dauḌī phirtī hai nashtar liye hue

naam un kā aa gayā kahīñ hañgām-e-bāz-purs

ham the ki uḌ ga.e saf-e-mehshar liye hue

'asġhar' harīm-e-ishq meñ hastī hī jurm hai

rakhnā kabhī na paañv yahāñ sar liye hue

asrar-e-ishq hai dil-e-muztar liye hue

qatra hai be-qarar samundar liye hue

aashob-e-dahr o fitna-e-mahshar liye hue

pahlu mein yani ho dil-e-muztar liye hue

mauj-e-nashim-e-subh ke qurban jaiye

aai hai bu-e-zulf-e-moambar liye hue

kya mastiyan chaman mein hain josh-e-bahaar se

har shaKH-e-gul hai hath mein saghar liye hue

qatil nigah-e-yas ki zad se na bach saka

KHanjar the hum bhi ek tah-e-KHanjar liye hue

KHira kiye hai chashm-e-haqiqat-shanas bhi

har zarra ek mehr-e-munawwar liye hue

pahli nazar bhi aap ki uff kis bala ki thi

hum aaj tak wo choT hain dil par liye hue

taswir hai khinchi hui naz-o-niyaz ki

main sar jhukae aur wo KHanjar liye hue

sahba-e-tund-o-tez ko saqi sambhaalna

uchhle kahin na shisha-o-saghar liye hue

main kya kahun kahan hai mohabbat kahan nahin

rag rag mein dauDi phirti hai nashtar liye hue

nam un ka aa gaya kahin hangam-e-baz-purs

hum the ki uD gae saf-e-mehshar liye hue

'asghar' harim-e-ishq mein hasti hi jurm hai

rakhna kabhi na panw yahan sar liye hue