aur bhi ho gae begana wo ghaflat kar ke

aur bhī ho ga.e begāna vo ġhaflat kar ke

āzmāyā jo unheñ zabt-e-mohabbat kar ke

dil ne chhoḌā hai na chhoḌe tire milne kā ḳhayāl

bār-hā dekh liyā ham ne malāmat kar ke

dekhne aa.e the vo apnī mohabbat kā asar

kahne ko ye hai ki aa.e haiñ ayādat kar ke

pasti-e-hausla-e-shauq kī ab hai ye salāh

baiTh rahiye ġham-e-hijrāñ pe qanā.at kar ke

dil ne paayā hai mohabbat kā ye aalī rutba

aap ke dard-e-davā-kār kī ḳhidmat kar ke

ruuh ne paa.ī hai taklīf-e-judā.ī se najāt

aap kī yaad ko sarmāya-e-rāhat kar ke

chheḌ se ab vo ye kahte haiñ ki sambhlo 'hasrat'

sabr o tāb-e-dil-e-bīmār ko ġhārat kar ke

aur bhi ho gae begana wo ghaflat kar ke

aazmaya jo unhen zabt-e-mohabbat kar ke

dil ne chhoDa hai na chhoDe tere milne ka KHayal

bar-ha dekh liya hum ne malamat kar ke

dekhne aae the wo apni mohabbat ka asar

kahne ko ye hai ki aae hain ayaadat kar ke

pasti-e-hausla-e-shauq ki ab hai ye salah

baiTh rahiye gham-e-hijran pe qanaat kar ke

dil ne paya hai mohabbat ka ye aali rutba

aap ke dard-e-dawa-kar ki KHidmat kar ke

ruh ne pai hai taklif-e-judai se najat

aap ki yaad ko sarmaya-e-rahat kar ke

chheD se ab wo ye kahte hain ki sambhlo 'hasrat'

sabr o tab-e-dil-e-bimar ko ghaarat kar ke