aur to koi bas na chalega hijr ke dard ke maron ka

aur to koī bas na chalegā hijr ke dard ke māroñ kā

sub.h kā honā dūbhar kar deñ rasta rok sitāroñ kā

jhūTe sikkoñ meñ bhī uThā dete haiñ ye aksar sachchā maal

shakleñ dekh ke saude karnā kaam hai in banjāroñ kā

apnī zabāñ se kuchh na kaheñge chup hī raheñge āshiq log

tum se to itnā ho saktā hai pūchho haal bichāroñ kā

jis jipsi kā zikr hai tum se dil ko usī kī khoj rahī

yuuñ to hamāre shahr meñ aksar melā lagā nigāroñ kā

ek zarā sī baat thī jis kā charchā pahuñchā galī galī

ham gumnāmoñ ne phir bhī ehsān na maanā yāroñ kā

dard kā kahnā chīḳh hī uTTho dil kā kahnā vaz.a nibhāo

sab kuchh sahnā chup chup rahnā kaam hai izzat-dāroñ kā

'inshā' jī ab ajnabiyoñ meñ chain se baaqī umr kaTe

jin kī ḳhātir bastī chhoḌī naam na lo un pyāroñ kā

aur to koi bas na chalega hijr ke dard ke maron ka

subh ka hona dubhar kar den rasta rok sitaron ka

jhuTe sikkon mein bhi uTha dete hain ye aksar sachcha mal

shaklen dekh ke saude karna kaam hai in banjaron ka

apni zaban se kuchh na kahenge chup hi rahenge aashiq log

tum se to itna ho sakta hai puchho haal bichaaron ka

jis jipsi ka zikr hai tum se dil ko usi ki khoj rahi

yun to hamare shahr mein aksar mela laga nigaron ka

ek zara si baat thi jis ka charcha pahuncha gali gali

hum gumnamon ne phir bhi ehsan na mana yaron ka

dard ka kahna chiKH hi uTTho dil ka kahna waza nibhao

sab kuchh sahna chup chup rahna kaam hai izzat-daron ka

'insha' ji ab ajnabiyon mein chain se baqi umr kaTe

jin ki KHatir basti chhoDi nam na lo un pyaron ka