baadban kholegi aur band-e-qaba le jaegi

bādbāñ kholegī aur band-e-qabā le jā.egī

raat phir aa.egī phir sab kuchh bahā le jā.egī

ḳhvāb jitne dekhne haiñ aaj saare dekh leñ

kyā bharosa kal kahāñ pāgal havā le jā.egī

ye añdhere haiñ ġhanīmat koī rasta DhūñD lo

sub.h kī pahlī kiran āñkheñ uThā le jā.egī

hosh-mandoñ se bhare haiñ shahr aur jañgal sabhī

saath kis kis ko bhalā kaalī ghaTā le jā.egī

jāgte manzar chhateñ dālān āñgan khiḌkiyāñ

ab ke phere meñ havā ye bhī uḌā le jā.egī

ek ik kar ke sabhī sāthī purāne kho ga.e

jo bachā hai vo nigāh-e-surmā-sā le jā.egī

jaate jaate dekh lenā gardish-e-lail-o-nahār

zindagī se bāñkpan lutf-e-ḳhatā le jā.egī

baadban kholegi aur band-e-qaba le jaegi

raat phir aaegi phir sab kuchh baha le jaegi

KHwab jitne dekhne hain aaj sare dekh len

kya bharosa kal kahan pagal hawa le jaegi

ye andhere hain ghanimat koi rasta DhunD lo

subh ki pahli kiran aankhen uTha le jaegi

hosh-mandon se bhare hain shahr aur jangal sabhi

sath kis kis ko bhala kali ghaTa le jaegi

jagte manzar chhaten dalan aangan khiDkiyan

ab ke phere mein hawa ye bhi uDa le jaegi

ek ek kar ke sabhi sathi purane kho gae

jo bacha hai wo nigah-e-surma-sa le jaegi

jate jate dekh lena gardish-e-lail-o-nahaar

zindagi se bankpan lutf-e-KHata le jaegi