hain jalwa-e-tan se dar-o-diwar basanti

haiñ jalva-e-tan se dar-o-dīvār basantī

poshāk jo pahne hai mirā yaar basantī

kyā fasl-e-bahārī ne shagūfe haiñ khilā.e

ma.ashūq haiñ phirte sar-e-bāzār basantī

geñdā hai khilā baaġh meñ maidān meñ sarsoñ

sahrā vo basantī hai ye gulzār basantī

us rashk-e-masīhā kā jo ho jaa.e ishāra

āñkhoñ se bane nargis-e-bīmār basantī

geñdoñ ke daraḳhtoñ meñ numāyāñ nahīñ geñde

har shāḳh ke sar par hai ye dastār basantī

muñh zard dupaTTe ke na āñchal se chhupāo

ho jaa.e na rañg-e-gul-e-ruḳhsār basantī

khiltī hai mire shoḳh pe har rañg kī poshāk

ūdī, agarī, champa.ī, gulnār, basantī

hai lutf hasīnoñ kī do-rañgī kā 'amānat'

do chaar gulābī hoñ to do chaar basantī

hain jalwa-e-tan se dar-o-diwar basanti

poshak jo pahne hai mera yar basanti

kya fasl-e-bahaari ne shagufe hain khilae

mashuq hain phirte sar-e-bazar basanti

genda hai khila bagh mein maidan mein sarson

sahra wo basanti hai ye gulzar basanti

us rashk-e-masiha ka jo ho jae ishaara

aankhon se bane nargis-e-bimar basanti

gendon ke daraKHton mein numayan nahin gende

har shaKH ke sar par hai ye dastar basanti

munh zard dupaTTe ke na aanchal se chhupao

ho jae na rang-e-gul-e-ruKHsar basanti

khilti hai mere shoKH pe har rang ki poshak

udi, agari, champai, gulnar, basanti

hai lutf hasinon ki do-rangi ka 'amanat'

do chaar gulabi hon to do chaar basanti