bahut din se tumhein dekha nahin tha

bahut din se tumheñ dekhā nahīñ thā

badan itnā kabhī suunā nahīñ thā

vo kaisī shab thī jo kaalī nahīñ thī

vo kaisā din thā jo ujlā nahīñ thā

ye vīrāna na thā vīrān itnā

ye sahrā is qadar sahrā nahīñ thā

vo sab kuchh sochnā ab paḌ rahā hai

tire baare meñ jo sochā nahīñ thā

kisī ik zaḳhm ke lab khul ga.e the

maiñ itnī zor se chīḳhā nahīñ thā

mujhe tum se koī shikva nahīñ hai

bahut din ho ga.e royā nahīñ thā

ka.ī atrāf khulte jā rahe haiñ

vo dushman thā magar itnā nahīñ thā

bahut din se tumhein dekha nahin tha

badan itna kabhi suna nahin tha

wo kaisi shab thi jo kali nahin thi

wo kaisa din tha jo ujla nahin tha

ye virana na tha viran itna

ye sahra is qadar sahra nahin tha

wo sab kuchh sochna ab paD raha hai

tere bare mein jo socha nahin tha

kisi ek zaKHm ke lab khul gae the

main itni zor se chiKHa nahin tha

mujhe tum se koi shikwa nahin hai

bahut din ho gae roya nahin tha

kai atraf khulte ja rahe hain

wo dushman tha magar itna nahin tha