bajae ham-safri itna rabta hai bahut

bajā.e ham-safrī itnā rābta hai bahut

ki mere haq meñ tirī be-zarar duā hai bahut

thī paañv meñ koī zanjīr bach ga.e varna

ram-e-havā kā tamāshā yahāñ rahā hai bahut

ye moḌ kaaT ke manzil kā aks dekhoge

isī jagah magar imkān-e-hādsa hai bahut

bas ek chīḳh hī yuuñ to hameñ adā kar de

muāmla hunar-e-harf kā judā hai bahut

mirī ḳhushī kā vo kyā kyā ḳhayāl rakhtā hai

ki jaise merī tabī.at se āshnā hai bahut

tamām umr jinheñ ham ne TuuT kar chāhā

hamāre hāthoñ unhīñ par sitam huā hai bahut

zarā chhuā thā ki bas peḌ aa girā mujh par

kahāñ ḳhabar thī ki andar se khokhlā hai bahut

koī khaḌā hai mirī tarah bhiiḌ meñ tanhā

nazar bachā ke mirī samt dekhtā hai bahut

ye ehtiyāt-kada hai kaḌe usūloñ kā

zarā se naqs pe 'bānī' yahāñ sazā hai bahut

bajae ham-safri itna rabta hai bahut

ki mere haq mein teri be-zarar dua hai bahut

thi panw mein koi zanjir bach gae warna

ram-e-hawa ka tamasha yahan raha hai bahut

ye moD kaT ke manzil ka aks dekhoge

isi jagah magar imkan-e-hadsa hai bahut

bas ek chiKH hi yun to hamein ada kar de

muamla hunar-e-harf ka juda hai bahut

meri KHushi ka wo kya kya KHayal rakhta hai

ki jaise meri tabiat se aashna hai bahut

tamam umr jinhen hum ne TuT kar chaha

hamare hathon unhin par sitam hua hai bahut

zara chhua tha ki bas peD aa gira mujh par

kahan KHabar thi ki andar se khokhla hai bahut

koi khaDa hai meri tarah bhiD mein tanha

nazar bacha ke meri samt dekhta hai bahut

ye ehtiyat-kada hai kaDe usulon ka

zara se naqs pe 'bani' yahan saza hai bahut