band-e-qaba ko KHuban jis waqt wa karenge

band-e-qabā ko ḳhūbāñ jis vaqt vā kareñge

ḳhamyāza-kash jo hoñge milne ke kyā kareñge

ronā yahī hai mujh ko terī jafā se har-dam

ye dil-dimāġh donoñ kab tak vafā kareñge

hai diin sar kā denā gardan pe apnī ḳhūbāñ

jiite haiñ to tumhārā ye qarz adā kareñge

darvesh haiñ ham āḳhir do-ik nigah kī ruḳhsat

goshe meñ baiThe pyāre tum ko duā kareñge

āḳhir to roze aa.e do-chār roz ham bhī

tarsā bachoñ meñ jā kar daarū piyā kareñge

kuchh to kahegā ham ko ḳhāmosh dekh kar vo

is baat ke liye ab chup hī rahā kareñge

aalam mire hai tujh par aa.ī agar qayāmat

terī galī ke har-sū mahshar huā kareñge

dāmān-e-dasht sūkhā abroñ kī be-tahī se

jañgal meñ rone ko ab ham bhī chalā kareñge

laa.ī tirī galī tak āvārgī hamārī

zillat kī apnī ab ham izzat kiyā kareñge

ahvāl-e-'mīr' kyūñkar āḳhir ho ek shab meñ

ik umr ham ye qissa tum se kahā kareñge

band-e-qaba ko KHuban jis waqt wa karenge

KHamyaza-kash jo honge milne ke kya karenge

rona yahi hai mujh ko teri jafa se har-dam

ye dil-dimagh donon kab tak wafa karenge

hai din sar ka dena gardan pe apni KHuban

jite hain to tumhaara ye qarz ada karenge

darwesh hain hum aaKHir do-ik nigah ki ruKHsat

goshe mein baiThe pyare tum ko dua karenge

aaKHir to roze aae do-chaar roz hum bhi

tarsa bachon mein ja kar daru piya karenge

kuchh to kahega hum ko KHamosh dekh kar wo

is baat ke liye ab chup hi raha karenge

aalam mere hai tujh par aai agar qayamat

teri gali ke har-su mahshar hua karenge

daman-e-dasht sukha abron ki be-tahi se

jangal mein rone ko ab hum bhi chala karenge

lai teri gali tak aawargi hamari

zillat ki apni ab hum izzat kiya karenge

ahwal-e-'mir' kyunkar aaKHir ho ek shab mein

ek umr hum ye qissa tum se kaha karenge