sukh jati hai meri chashm-e-rawan barish mein

suukh jaatī hai mirī chashm-e-ravāñ bārish meñ

āsmāñ hotā rahe ashk-e-fishāñ bārish meñ

saare sahrā.ī rihā.ī ke tamannā.ī na the

aa gayā le ke hameñ qais kahāñ bārish meñ

ghoñsle TuuT ga.e peḌ gire bāñdh gire

gaañv pe phir bhī javāñ nashsha-e-jāñ bārish meñ

terī sarsabz bahāroñ pe damakte qatre

lauh-e-mahfūz ke kuchh ramz-e-nihāñ bārish meñ

lab-e-ehsās kabhī tū kisī qābil ho jā

chuum le manzil-e-mub.ham ke nishāñ bārish meñ

hāñptī kāñptī mazbūt irādoñ vaalī

bench pe baiThī huī mahv-e-gumāñ bārish meñ

pahlī Tap Tap hī mire hosh uḌā detī hai

niiñd uḌtī hai aTak jaatī hai jaañ bārish meñ

aaj bhī Dartā huuñ bijlī ke kaḌāke se bahut

us ko qaabū meñ kiyā kartī thī maañ bārish meñ

mere kamre kā makīñ habs galā ghoñTtā hai

koī to ramz-e-aziyyat hai nihāñ bārish meñ

sukh jati hai meri chashm-e-rawan barish mein

aasman hota rahe ashk-e-fishan barish mein

sare sahrai rihai ke tamannai na the

aa gaya le ke hamein qais kahan barish mein

ghonsle TuT gae peD gire bandh gire

ganw pe phir bhi jawan nashsha-e-jaan barish mein

teri sarsabz bahaaron pe damakte qatre

lauh-e-mahfuz ke kuchh ramz-e-nihan barish mein

lab-e-ehsas kabhi tu kisi qabil ho ja

chum le manzil-e-mubham ke nishan barish mein

hanpti kanpti mazbut iradon wali

bench pe baiThi hui mahw-e-guman barish mein

pahli Tap Tap hi mere hosh uDa deti hai

nind uDti hai aTak jati hai jaan barish mein

aaj bhi Darta hun bijli ke kaDake se bahut

us ko qabu mein kiya karti thi man barish mein

mere kamre ka makin habs gala ghonTta hai

koi to ramz-e-aziyyat hai nihan barish mein