bas apni KHak par ab KHud hi sultani karenge hum

bas apnī ḳhaak par ab ḳhud hī sultānī kareñge ham

isī miTTī pe rañgoñ kī farāvānī kareñge ham

use rone do mat roko ki ronā bhī zarūrī hai

kabhī is ātish-e-sayyāl ko paanī kareñge ham

tumhāre ḳhvāb lauTāne pe sharminda to haiñ lekin

kahāñ tak itne ḳhvāboñ kī nigahbānī kareñge ham

mohabbat meñ ye sharteñ to tijārat bantī jaatī haiñ

tirī ḳhātir kahāñ tak kār-e-lā-sānī kareñge ham

bahut be-zār kar rakkhā hai ham ko kār-e-duniyā ne

kisī ke dil meñ ab kuchh roz mehmānī kareñge ham

ye rishta dostī kā lutf se ḳhālī hai so is ko

kisī tadbīr se ab dushman-e-jānī kareñge ham

bas apni KHak par ab KHud hi sultani karenge hum

isi miTTi pe rangon ki farawani karenge hum

use rone do mat roko ki rona bhi zaruri hai

kabhi is aatish-e-sayyal ko pani karenge hum

tumhaare KHwab lauTane pe sharminda to hain lekin

kahan tak itne KHwabon ki nigahbani karenge hum

mohabbat mein ye sharten to tijarat banti jati hain

teri KHatir kahan tak kar-e-la-sani karenge hum

bahut be-zar kar rakkha hai hum ko kar-e-duniya ne

kisi ke dil mein ab kuchh roz mehmani karenge hum

ye rishta dosti ka lutf se KHali hai so is ko

kisi tadbir se ab dushman-e-jaani karenge hum